Máskeýde Qazaqstan men Reseı SІM basshylarynyń kezdesýi ótip jatyr

MÁSKEÝ. QazAqparat – Máskeýde Qazaqstan men Reseıdiń syrtqy ister mınıstrleri Muhtar Tileýberdi men Sergeı Lavrovtyń ekijaqty kezdesýleri bastaldy, dep habarlaıdy QazAqparat tilshisi.

S.Lavrov taraptar birqatar baǵyttar boıynsha qarqyndy baılanystardy, saıası dıalog pen ózara is-qımyldy jalǵastyratynyn málimdedi. Bul rette búgin Máskeýde ótip jatqan ShYU Syrtqy ister mınıstrleriniń keńesi tolyqqandy kelissózder júrgizý úshin qolaıly jaǵdaı jasaıdy.

«Bizde eki jaqty baılanystar turǵysynan alǵanda jyldyń ekinshi jartyjyldyǵy birqatar is-sharaǵa toly. Biz Kókshetaýda Aımaqaralyq yntymaqtastyq forýmyn joǵary dárejede ótkize alamyz dep úmittenemiz. Sondaı-aq Saýda-ekonomıkalyq yntymaqtastyq jónindegi úkimetaralyq komıssııanyń otyrysyn qosa alǵanda, basqa da is-sharalar óz deńgeıinde ótetinine senimdimiz», - dep atap ótti S. Lavrov.

«Federatsııa Keńesiniń Tóraǵasy Valentına Matvıenkonyń Qazaqstanǵa saparyn qosa alǵanda, birqatar saparlar josparlanǵan. Árıne, bizdiń mınıstrlikter BUU, EQYU jáne basqa da halyqaralyq uıymdardyń kún tártibine shyǵarylatyn máselelerdi únemi tekserip otyrady. Olardyń qatarynda Eýrazııalyq ekonomıkalyq ıntegratsııa, TMD qyzmeti, UQShU taqyryby da bar», -dedi RF SІM basshysy.