Máskeýde bıyl kúzde Álıhan Bókeıhanovtyń qabirine estelik taqtaısha qoıylady
Bul týraly búgin Almatyda Álıhan Bókeıhanovtyń 150 jyldyǵyna arnalǵan ekspedıtsııaǵa qatysýshy, fılologııa ǵylymdarynyń doktory Aıgúl Ysmaqova Álıhan Bókeıhanovtyń murasyn zertteýge arnalǵan dóńgelek ústel barysynda málimdedi.
«Qazir zırattaǵy baýyrlastar qabirinde Álıhan Bókeıhanov pen Nyǵmet Nurmaqovqa arnalǵan ortaq taqtaısha bar. Biz Don zıratynyń basshylyǵymen sóılesip, kelisimge qol jetkizdik. Bıyl kúzge qaraı, Álıhan Bókeıhanovqa arnap bólek taqtaısha ornatýdy josparlap otyrmyz. Ol qazaq jáne orys tilinde jazylady. Óıtkeni, máskeýlikter de Álıhan Bókeıhanovtyń kezinde Memlekettik dýmanyń múshesi bolǵanyn bilýleri kerek», - dedi Aıgúl Ysmaqova.
Sonymen qatar, onyń aıtýynsha, ekspedıtsııaǵa qatysýshylar Álıhan Bókeıhannyń Máskeýde Úlken Kıslovskıı kóshesinde talaı jyl turǵan úıge de estelik taqta ornatýǵa kúsh salady.
«Ókinishke qaraı, Qaraǵandyda, Ombyda, Semeıde Álıhan Bókeıhanovtyń aty berilgen kóshe joq. Ol bilim alǵan ǵımarattarǵa birde-bir estelik taqtaısha qoıylmaǵan. Óıtkeni, bul ǵımarattar tarıhı qundylyqqa ıe», - dedi ǵalym.
Budan basqa, Qazaqstannyń tarıhy men mádenıeti týraly blogtyń negizin qalaýshy jýrnalıst Aıjan Hamıt Qarqaralyda Álıhan Bókeıhanov oqyǵan ýchılışe ǵımaratynyń jalǵa berilgendigine ókinish bildirdi.
«Tarıhı tulǵalarǵa qatysty tarıhı ǵımarattardy saqtaı bilýimiz kerek. Álıhan Bókeıhan qazaq halqynyń ardaqty uldarynyń biri. Ol kózi tirisinde jetkilikti baǵalanǵan joq», - dedi ol.