Máskeýde Astananyń 20 jyldyǵyna arnalǵan is-sharalar ótedi

MÁSKEÝ. QazAqparat -  29 maýsym kúni Máskeýdegi Halyq sharýashylyq jetistikteriniń kórmesinde Astananyń 20 jyldyq mereıtoıyna arnalǵan arhıtektýralyq kórmeniń ashylý saltanaty ótedi, dep habarlaıdy QazAqparattyń menshikti tilshisi. 

Kórmeniń ashylý saltanatyna Reseı Federatsııasynyń Qarjy mınıstri Anton Sılýanov pen Qazaqstan Respýblıkasy Premer-mınıstriniń birinshi orynbasary Asqar Mamın qatysady.

Kórme eskpozıtsııasy Astananyń qalyptasý tarıhyn, onyń qazirgi aınasyn, keleshektegi damýy men ınvestıtsııalyq áleýetin tanytady.

Ekspozıtsııa 4 bloktan turatyn bolady. Onda nysandar qurylysynyń qalalyq jáne jeke jobalary, ınteraktıvti materıaldar men prezentatsııalar, sýretter men nobaılar, stendter men maketter kórsetiledi.

Ashylý saltanaty 29 maýsym kúni saǵat 10.00-de HShJK (Beıbitshilik dańǵyly, 119), №75 pavılonnyń  «A» blogynda ótedi.

Astananyń 20 jyldyǵyn merekeleý aıasynda tolyq jańartýdan ótken «Qazaqstan» pavılonynyń tarıhı bólimi ashylady.

Sharaǵa qatysýshylar zamanaýı arhıtektýranyń úlgisi retinde qaıta jóndeýden ótken pavılonnyń ǵımaratyn tamashalaı alady.

HShJK qonaqtary ulttyq kásip jármeńkesi, qazaq aýylynyń kórinisi, ejelgi dala dástúrin dáripteıtin mýzykalyq baǵdarlamalardy qamtıtyn merekelik kontsertti tamashalaı alady.