Máskeýde Abaı ınstıtýtyn qurý usynyldy

<p>Qazaqstannyń Reseıdegi Elshisi Dáýren Abaev Máskeýde qazaq mádenıetiniń qoǵamdyq birlestikteriniń ókilderimen kezdesti, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

Dáýren Abaev Qazaqstan basshylyǵy shetelde turatyn otandastardy qoldaýǵa erekshe kóńil bóletinin atap ótti. Ol Máskeýdegi qazaq dıasporasyn Qazaqstan men Reseıdiń rýhanı-mádenı jaqyndasýynyń jasampaz saıasatynyń negizgi býyny jáne júrgizýshisi dep atady.

Óz kezeginde qonaqtar týǵan jerden jyraqta júrgende ózderiniń tarıhı Otanymen ajyramas baılanysty sezinetinin, Qazaqstanda bolyp jatqan barlyq oqıǵalardan habardar ekenin jáne óskeleń urpaqtyń ana tilin, mádenıeti men salt-dástúrin úırenýine belsendi túrde yqpal etetinin atap ótti. Olar kórsetilgen iltıpat pen qoldaý úshin alǵystaryn bildirip, ózara qarym-qatynas boıynsha usynystaryn bildirdi.

Atap aıtqanda, Qazaqtyń etnıkalyq mádenıetin saqtaý jáne damytý jónindegi kommertsııalyq emes uıymdar odaǵy keńesiniń jaýapty hatshysy Polat Djamalov Máskeýde Gete men Servantes ınstıtýttaryna uqsas Abaı ınstıtýtyn qurý týraly bastama kóterdi. Sondaı-aq ol respýblıkada ár jyldary ómir súrip, eńbek etken jáne osy kezeńniń jyly estelikterin saqtaǵan reseılikter arasynan Qazaqstannyń dostary qaýymdastyǵyn qaıta jańǵyrtýdy usyndy.

Al "Eýrazııa áıelder forýmy" óńirlik qoǵamdyq uıymynyń úılestirý keńesiniń tóraǵasy Raýshan Qanapıanova qarasha aıynyń sońynda Máskeýde ótetin "Etno-Erato" ulttyq kıimderiniń XXII Eýrazııalyq joǵary sán baıqaýyna shaqyrdy.

Kezdesýge sondaı-aq "Astana" halyqtar dostyǵy men ulttyq mádenıetterdi nasıhattaý qorynyń prezıdenti Jarqyn Óteshova, "Pamıat" kommertsııalyq emes uıymynyń basqarma tóraıymy Gúlzıfa Smırnova jáne basqalar qatysty.