Máskeý metrosynda Qazaqstannyń Uly Jeńiske qosqan úlesi týraly baıandaıtyn arnaıy poıyz júre bastady (FOTO)
Bul týraly QR Syrtqy ister mınıstrliginiń baspasóz qyzmeti habarlady.
Kóshpeli ekspozıtsııa Qazaqstanda qurylyp, odan keıin Máskeýdi, Sevastopoldi, Lenıngradty qorǵaýda, Ýkraınany azat etýge qatysqan dıvızııalardyń áskerı joly, basyp alynǵan aýmaqtarda partızandar qataryndaǵy qazaqstandyqtardyń batyr isteri, sondaı-aq elimizge kóshirilgen áskerı-ónerkásiptik kásiporyndarynyń maıdandy jabdyqtaýǵa qosqan úlesi týraly baıandaıdy.
Qazaqtyń uly aqyndarynyń aldyńǵy saptaǵy jaýyngerlerge, qorshaýǵa túsken Lenıngrad turǵyndaryna arnalǵan jalyndy jyrlary olarǵa kúsh-jiger berdi, erekshe tolǵandyrdy, Máselen, uly Jambyl Jabaevtyń «Lenıngradtyq órenderim!» atty jyry kópshilikke keńinen tanymal boldy. Al basqa sýretterde keń-baıtaq dalasyna kóshirilgen halyqtardy qazaqtardyń jyly qabyldaǵany týraly kórsetedi, al jetim qalǵandardy asyrap alý kezinde jasaǵan posterler men derekti fılmder eshkimdi enjar qaldyrmaıtyndyǵy anyq.
Mobıldik qurylǵynyń ıeleri «Narodnyı opolchenets» poıyzyndaǵy sýretterde beınelengen QR-kod arqyly ekspozıtsııanyń keńeıtilgen nusqasymen tanysa alady. Tolyǵyraq aıtqanda, kez kelgen metro jolaýshysy Elshilik jáne «Qazaqstan» teleradıokorporatsııasy birlesip ázirlegen Uly Otan soǵysy taqyrybyndaǵy arnaıy beınerolıkterdi ózderine erkin kóshire alady.
Jeńiske arnalǵan, biryńǵaı maǵynalyq kompozıtsııasymen biriktirilgen barlyq jınaǵyn alǵanda, «Narodnyı opolchenets» poıyzy 50 postermen jasaqtalǵan. Jeńis poıyzynyń ekspozıtsııasyn qalyptastyrýǵa Reseı áskerı-tarıhı qoǵamdastyǵy, «Vechernıaıa Moskva» gazetiniń redaktsııasy, Máskeýdi qorǵaý memlekettik murajaıy, 1941-1945 jyldar kezeńinde Uly Otan soǵysynyń ortalyq murajaıy da atsalysty. Poıyzdaǵy kórme jarty jyl boıy jumys isteıtin bolady.
Poıyz ekspozıtsııasyn ashý rásimine Reseıdegi Qazaqstan Elshiliginiń Keńesshi-Ýákili Vıktor Temirbaev, Máskeý metropolıteni basshysynyń orynbasary Vladımır Pogodın jáne jergilikti ardagerler qoǵamdastyqtardyń ókilderi qatysty.
Bul kúnderi, Qazaqstan Elshiliginiń qomqorlyǵymen Reseıdiń eń iri metropolıtenderinde Uly Jeńistiń 70-jyldyǵyna arnaıy uıymdastyrylǵan biryńǵaı jobanyń iske asyrylýy aıaqtalyp ta qaldy. 28 sáýirde Sankt-Peterbor qalasy metrosynyń úsh baǵyty boıynsha «Jalpyǵa ortaq - Jeńis!» degen uranmen fashızmge qarsy shaıqastaǵy Qazaqstannyń qosqan úlesi týraly ekspozıtsııalarmen bezendirilgen vagondar júre bastady. Al mamyr aıynyń basynda Qazan qalasynyń «Jeńis dańǵyly» metro stansasynda osy taqyrypqa arnalǵan ekspozıtsııa ashyldy.