Maska taqqan adamdar kómirtegimen dem alady: Jelide taǵy bir feık tarady

NUR-SULTAN. QazAqparat - Áleýmettik jelilerde «pandemııa – jahandyq qastandyq, al maska taqqan adamdar kómirtekpen dem alýǵa májbúr» degen aqparat tarady. Munyń bári - konspırologııalyq jáne ǵylymǵa qarsy teorııa, dep jazady Stopfake.kz.

Pandemııany belgili bir álemdik úkimet josparlamaǵanyn jazǵan bolatynbyz.

Konspırologııany jaqtaýshylar pandemııanyń josparlanǵanyna dálel retinde belgisiz koronavırýstyń gıpotetıkalyq órshýine arnalǵan «Oqıǵa-201» oqý-jattyǵýlaryn keltirýde. Shara 2019 jyly pandemııa bastalǵanǵa deıin ótti.

Paıdalanýshylar uqsastyqtardy birden baıqady.

Shyn máninde, «Oqıǵa-201» sharasy men COVID-19 pandemııasyna ortaq nárse – bul eki jaǵdaıda da koronavırýs qozdyrǵysh bolyp tabylady.

Qalǵan bóliginde stsenarıı COVID-19 pandemııasynan aıtarlyqtaı erekshelenedi.

Oqý-jattyǵýlar stsenarııine sáıkes, vırýs Brazılııada anyqtalady, ol áldeqaıda juqpaly, odan bolatyn ólim-jitim áldeqaıda kóp jáne vaktsına halyqtyń 90% aýrý juqtyrǵan kezde ǵana ázirlendi.

Mundaı oqý-jattyǵýlar stsenarııi mindetti túrde oryndalýy tıis emes. Onyń ústine mundaı sharalar jıi uıymdastyrylady.

Eń tanymaldary – «Qarańǵy qys» (2001), transatlantıkalyq bıoterrorıstik shabýyl modeldelgen «Atlantıkalyq daýyl» (2005) jáne «Kleıd–IKS» – vaktsınasy ázirlenbegen jańa vırýsqa arnalǵan stsenarıı (2018).

Maska taqqan adamdar tolyqtaı kómirtegimen tynys alýǵa májbúr degen tujyrym - ǵylymǵa qarsy.

Birinshiden, adamdar ottegin jutyp, kómirqyshqyl gazyn shyǵarady, bul taza kómirtegi emes, onyń dıoksıdi bolyp tabylady.

Kómirqyshqyl gazynyń molekýlalary mólsherine baılanysty maskada turyp qalmaıdy. Kómirqyshqyl gazynyń bir molekýlasynyń mólsheri - 0.33 nanometr.

Al jaı medıtsınalyq maskanyń talshyqtary arasyndaǵy tesikter 0.3-ten 10 mıkronǵa deıin.

Bul rette, maska mólsheri 5-ten 15 mıkronǵa deıin bolatyn silekeı men qaqyryq bólshekterimen birge taralatyn vırýsty ustap qalady.

Buǵan deıin biz maska taǵy ottegi jetispeýshiligine ákeledi degen feıkti joqqa shyǵarǵan bolatynbyz.

Demek, taratylǵan aqparat durys emes. Pandemııa aldyn ala josparlanbaǵan jáne maska taǵý kómirtekpen ýlanýǵa ákelmeıdi.