Maska taǵý, qol alyspaý – Qurbandyq shalatyn oryn men qasapshyǵa qandaı talaptar qoıylady
«Qasaphanaǵa mindetti túrde betperde taǵyp kirip, antıseptık zattaryn barynsha paıdalaný kerek. Araqashyqtyqty qatań saqtaý, bir-birimen qol alyspaý, dene qyzýy 37 gradýstan joǵary, tumaý jáne basqa da aýrý belgileri bar adamdarǵa kelmeý jáne jasy 65-ten asqan qarııalardyń, áıelder men balalardyń qurban malyn shalatyn oryndarǵa barmaýy suralady», - dedi Ershat Ońǵar Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, qasapshy musylman bolýy kerek, kámeletke tolǵan, fızıkalyq jáne psıhıkalyq turǵyda saý, mal soıýdy jaqsy meńgergen bolýy qajet.
«Soıylatyn jerge maldy qınamaı aparý kerek. Pyshaqty mal aldynda qaıraýǵa, ótpes pyshaqpen soıýǵa, bir maldyń kózinshe basqa bir maldy baýyzdaýǵa bolmaıdy. Maldy qubylaǵa qaratyp, sol jaǵymen jatqyzyp, eki aldyńǵy aıaǵy men bir artqy aıaǵyn qosa baılaý kerek. Birden óńeshtiń eki kúretamyryn kesip, jany shyqqanyn kútý kerek. Jany shyqpaı turyp, terisin almańyzdar. Soıylǵan maldyń terisi men ishek-qarnyn aıaqasty etpeı, barynsha qoldanýy shart», - dep túsindirdi naıb múftı.
Qasaphanaǵa keletin adamdardyń dene qyzýyn ólshenedi, antıseptık pen maska qoıylady.
«Qasaphanaǵa tolymdyǵyn 30 paıyzdan asyrmaı, keminde 1 metr ara qashyqtyqty bildiretin syzyqtar syzý qajet. Aqparat taqtasyn jasaý nemese qabyrǵaǵa qajetti málimetti ilý, qaýipsizdik erejelerimen tanysý jáne mal soıylatyn jerlerdiń taza bolýy da talap etiledi», - deıdi Ershat Ońǵar.
Buǵan deıin naıb múftı qurbandyq shalatyn oryndarǵa barý úshin aldyn ala jazylý qajettigin eskertken edi.
Sondaı-aq, bıyl qurbandyq shalatyn arnaıy oryndarda «ASHYQ» mobıldi qosymshasy iske qosylady. «Qyzyl» jáne «sary» mártebesi bar azamattar qurbandyq shalý oryndaryna jiberilmeıdi, «kók», «jasyl» mártebesi barlar ǵana kirgiziledi.
Bas múftıdiń aıtýynsha, qurban2021.kz saıty búgin saǵat 15:00-de iske qosylyp, Qurban aıttyń úshinshi kúni ıaǵnı 22-shi shildege deıin jumys isteıdi. Qurban shalýǵa nıet etken azamattar osy aralyqta tapsyrystaryn bere alady. Osy saıt arqyly respýblıka boıynsha muqtaj jandar qurbandyq etin alý úshin 17 shildeden bastap ótinish bildire alady.