Mask Twitter jelisine ózgertýler engizýdi usyndy
22:48, 10 Sáýir 2022
NUR-SULTAN. QazAqparat – Amerıkalyq kásipker Ilon Mask Twitter Blue aqyly jazylýshylarynyń barlyǵyna áleýmettik jeliniń rastalǵan qoldanýshysy mártebesin berýdi usyndy. Ol bul ıdeıasyn tvıt arqyly jarııalady, dep habarlaıdy QazAqparat.
«Twitter Blue jazylýshylarynyń árqaısysy (ıaǵnı, aıyna $3 tóleıtinder) aýtentıfıkatsııa belgisin alýy tıis»
, - dep jazdy Mask.
Aıta keteıik, ol taıaýda Twitter kompanııasynyń iri aktsıoneri atanǵan. Kásipker jeliniń AQSh-tan tys jerlerdegi paıdalanýshylary úshin jazylym quny qoljetimdilikke saı bolýy keregin aıtady. Sonymen qatar, Dogecoin krıptovalıýtasy arqyly tólem jasaý múmkindigi týraly tuspaldady.
Mask jazylym fýnktsııasyn túbegeıli ózgertýdi usyndy.
«Baǵasy aıyna $2 aınalasynda bolýy tıis, biraq aldyn ala 12 aıǵa tólem jasalýy kerek. Akkaýnt qanat belgisin 60 kún ótken soń ǵana alady. Al, paraqsha alaıaqtyq nemese spam úshin qoldanylsa, onda jabylady jáne tólegen aqshasy qaıtarylmaıdy»
, - dedi kásipker.
Eske salsaq, ótken kúzde Twitter-diń negizin qalaǵan Djek Dorsı kompanııanyń bas dırektorlyǵynan ketken bolatyn.