Mashınıst: Kenshilerdi tıisti tereńdikke jetkizý — jaýapty jumys

<p>AQTÓBE. KAZINFORM — Aqtóbe oblysy Hromtaý aýdanyndaǵy Dóń ken baıytý kombınatynda kóterý mashınasynyń mashınısi bolyp jumys isteıtin Klıaıhan Týrebaeva shamamen 20 jyldyq tájirıbesi bar maman. Ol shahterlerdiń jerastyna túsip, joǵary kóterilýine jaýapty. Uzaq jyldar boıy tapjylmaı jumys istep júrgen ol bul bólimde tek jaýapkershiligi bar adamdardyń eńbek etetinin aıtyp berdi.</p>

Klıaıhan Týrebaeva Aqtóbeniń Hromtaý qalasyna Qostanaı oblysy Jetiqara aýylynan otbasymen birge kóship keldi.

Bul 2000 jyl bolatyn. Aldymen joldasy ken ornynda shahter bolyp eńbek etip, keıin ózi de balasymen ere kóshti. 

Sodan beri bul otbasy Hromtaý aýdanynyń turǵyny. 

— Ózim 2004 jyly eden jýýshy bolyp jumysqa kirdim. Keıin joǵary qabattaǵy sıgnalshy qyzmetin atqardym. Sol jerde 1 jyldan astam ýaqyt eńbek ettim. Mashınıst qajet degendi estip, sol mamandyqty meńgerý úshin qosymsha bilim aldym. Bul 4 aılyq kýrs. Dóń ken baıytý kombınatyndaǵy jumysym ózime unap, 2009 jyly shilde aıynda mashınıst qyzmetine kiristim. Qazir shahterlerdiń dittegen jerine jetýine jaýaptymyn. Bizge aldyn ala túsý tereńdigi týraly aqparat berilip, habarlama alamyz. Keıin sol tapsyryspen jumysshylardy tómen túsirip, alyp shyǵamyz. Olardyń ózimen birge alyp júretin qural-jabdyqtaryn da jetkizip beremiz, — deıdi Qazaqstan Táýelsizdiginiń 10 jyldyǵy atyndaǵy shahtada jumys isteıtin mashınıst Klıaıhan Týrebaeva.

Tájirıbeli mashınıstiń aıtýynsha, keıde elektr togy ajyratylyp qalyp, olar 6 Vt jelini qaıta qosady.

Foto: Dóń ken baıytý kombınaty

Bir aýysymda 8 saǵat jumys isteıtin ol sıgnalshylarmen tyǵyz qarym-qatynas ornatqan. Mashınıstiń qulaǵy da, kózi de sıgnalshylar dese bolady.

Sebebi olar shahtaǵa túsý deńgeıin naqtylap beredi. 

— Maǵan óz jumysym unaıdy. Úsh kún tańerteń jumys istep, bir kún demalamyn. Keıin úsh kún túngi aýysymǵa baryp, bir kún demalys beriledi. Ár aýysymǵa qýana baratyn adammyn. Óz mashınam da ózime unaıdy. Alǵashynda barlyǵyn qolmen basqaratyn edik. Qarapaıym kólikti toqtatý kezinde pedaldi aıaqpen bassaq, munda qolmen tartamyz. Al 2011 jyldan bastap bári avtomattandyryldy. Ujymda men sekildi 30 adam jumys isteıdi. Bári de ózim sııaqty qyz-kelinshekter, áıelder, — dedi Klıaıhan Týrebaeva.

Ol mashına tutqasyn alǵash ustaǵan sátin este saqtap júr. Bul úlken senimmen qatar, boıdaǵy úreıdi týǵyzǵan kez boldy.

Ýaqyt óte kele bárin úırenip, meńgerip aldy. 

— Bizdiń salaǵa jastar da qyzyǵady. Olar da osy mamandyqty jaqsy meńgerip alǵan. Munda merekelik demalys degen qarastyrylmaǵan soń 8-naýryz kúni ádettegideı ótedi. Ózim dál sol kúni aýysymda bolamyn. Ken ornynda jumys istep júrgenime 20 jylǵa jýyq ýaqyt boldy. Bárine úırendik desem artyq aıtqanym emes. Negizi ózim bul salany naqty bilmedim alǵashynda. Biraq jumysshylardy alyp ketip, aparyp tastaıtyn avtobýsty kórgende «qashan men de osylaı júremin» dep oılaıtyn edim. Kúıeýim shahter bolyp, men de sońynan ilestim. Áıel de er adamǵa ilesip jumys isteýi kerek dep oılaımyn, úıde otyrǵannan góri, — deıdi ol.

Foto: Dóń ken baıytý kombınaty

Mashınıstiń aıtýynsha, Dóń ken baıytý kombınatyna qarasty Qazaqstan Táýelsizdiginiń on jyldyǵy atyndaǵy shahtanyń tereńdigi — shamamen 700 metrdeı.

Mashınıster bolsa sol tereńdikke túsetin shahterlerdiń ómirine jaýapty. Sondyqtan da ár sátte shıraq júredi ári elektr togynyń jaǵdaıyn da baqylap otyrady.

Bul shahterlerdiń qaýipsizdigi úshin qajetti shara. Bári birqalypty bolsa, jer astyna barar jol kidirissiz ótedi.