«Másele sheshkish» laýazym ıeleri kásipkerlikke qatty kedergi keltirip otyr – antıkor

NUR-SULTAN. QazAqparat – QR Sybaılas jemqorlyqqa qarsy is-qımyl agenttigi jemqorlardyń kásipkerlikke qatty kedergi keltirip otyrǵanyna alańdaýshylyq bildirýde, dep habarlaıdy QazAqparat tilshisi.

«Kólik baqylaý ınspektsııasynda qylmystyq shemalardy áshkereleý jalǵasýda. Mysaly, Almaty oblysynda osy vedomstvo basshysynyń orynbasary Janturov júıeli negizde júk avtokóliginiń kedergisiz ótkizý úshin 50 myńnan 240 myń teńgege deıingi somada zańsyz syıaqy alyp kelgen (sot sheshimimen 99 mln teńge aıyppul tóleýge mindetteldi)», - deıdi agenttiktiń asa mańyzdy ister jónindegi tergeýshisi Danııar Bekaıdarov onlaın baspasóz máslıhatynda.

Onyń aıtýynsha, keıbir laýazymdy qyzmetkerler kásipkerlik qyzmetke barynsha kedergi keltiredi. «Máseleni sheshemin» degen jeleýmen qamqorlyqqa alǵan bolyp kásipkerlerden para alady.

«Máselen, Pavlodar oblysynda oblystyq TJD Órt qaýipsizdigin baqylaý basqarmasynyń bastyǵy podpolkovnık Iskakov sottaldy. Ol órt qaýipsizdigin tekserý barysynda anyqtalǵan buzýshylyqtar boıynsha sharalar qabyldamaý úshin saýda úıiniń ókilinen 500 myń teńge mólsherinde para alǵan (5 mln teńge mólsherinde aıyppulǵa ilikti)», - deıdi ol.

Kásipkerlik qyzmetke zańsyz aralasý faktileri de tyıylar emes. Máselen, Almaty oblysynda «Almatyjollaboratorııa» RMM basshysy S. S. Kenjeǵulǵa para alǵany jáne kásipkerlik qyzmetke zańsyz qatysqany úshin 40 mln teńge kóleminde aıyppul salynǵan.