Masanshydaǵy dúngen ultynyń ókilderi qazaq tilin úırenýde

QORDAI AÝDANY. QazAqparat – Byltyr Jambyl oblysynyń Qordaı aýdanyndaǵy Masanshy, Sortóbe aýyldarynda bolǵan qaqtyǵys kezinde birqatar úı men kásipkerlik nysany zardap shekken edi. Keıinnen memleket tarapynan olarǵa qoldaý kórsetilip, atalǵan nysandar az ýaqyttyń ishinde qaıta qalpyna keltirildi. QazAqparat tilshisi bir jyldan astam ýaqyttan keıin osy eldi mekenderdi aralap, aýyl turǵyndarynyń qazir qalaı ómir súrip jatqanyn bilip qaıtty.

Masanshy aýyly aýdan ortalyǵy - Qordaı kentinen 60 shaqyrym jerde ornalasqan. 2020 jyly aýyl tanymastaı ózgerdi. Tabıǵı gaz, aýyz sý, ınternet tartyldy, joldarǵa asfalt tóselip, saıabaq paıda boldy.

«Bizdiń aýyl qatty ózgerdi. Úkimet rezervinen 575,8 mln teńge, al jol kartasy boıynsha 1,8 mlrd teńge bólindi. Memleketke alǵys aıtamyz. Aýyldaǵy 41 kóshege asfalt tóseldi. Barlyq qıraǵan úıler men kommertsııalyq nysandar qalpyna keltirildi. Sondaı-aq, bıyl 800 kóshet otyrǵyzyldy «, - deıdi Masanshy aýyldyq okrýginiń ákimi Ramazan Malıev.

Masanshy aýyldyq okrýginde 19 myńdaı halyq bar. Turǵyndar negizinen jerdi óńdep kún kóredi.

«Byltyr Sortóbe, Aýqatty, Masanshy turǵyndary 5 623 gektar alqapta kókónis ósirdi. Jalpy Masanshyda 40-qa jýyq, al Sortóbede 50-60 sharýa qojalyq bar. Aýdanda 135 myń gektar egis alqabymyz bolsa, onyń 134 myńyn bıyl ıgerýdi josparlap otyrmyz. Memleket mıneraldy tyńaıtqyshtar men dızel otynyna, sondaı-aq qural-jabdyqtarǵa sýbsıdııa beredi «, - deıdi Qordaı aýdandyq aýyl sharýashylyǵy bóliminiń basshysy Ádilet Qaspaqbaev.

Aýyl turǵyndary, 2020 jyldyń aqpan aıynda bolǵan oqıǵany eske túsirgisi kelmeıdi. Qazir aýylda bári jaqsy,tynysh ekenin atap ótti. Búlingen dúnıelerin qaıta qalpyna keltirýge kómek kórsetken memleket basshysyna rızashylyqtaryn bildirdi.

Qaqtyǵys kezinde aýyl turǵyny Abdýrashıd Madıevtiń baspanasy men aýyr júk kóligine órt tıgen. Atalǵan turǵynnyń úıi búginde qalpyna keltirilgen.

«Meniń úıim, júk jáne jeńil mashınam tolyǵymen órtenip ketti. Men otbasymmen ýaqytsha baýyrlarymnyń úıin panaladym. Meniń balalarym men nemerelerim bar. Bizdiń úıdi qalpyna keltirýge shamamen 4 mln teńge, sondaı-aq qurylys materıaldarymen kómektesken memleketke rızamyn. Ótken jyldyń kúzinde biz jóndeý jumystaryn aıaqtap, úıimizge oraldyq «, - dedi ol.

Masanshy aýyldyq okrýgi ardagerler keńesiniń tóraǵasy Beder Dvýmarovtyń aıtýynsha, qazir halyq qazaq tilin úırenip jatyr. Onyń ishinde meshit ımamdary da bar. Aqsaqaldar birneshe ret bas qosty, qazir dostyq qatynasy jaqsy jolǵa qoıylǵan.

«Bizde buryn ınternet bolmaǵan. Bıyl tartyp berdi. Eń bastysy – aýylǵa tabıǵı gaz keldi. Men bizdiń Prezıdentimizge jáne Elbasyǵa, sondaı-aq Jambyl oblysy men aýdan ákimine úlken alǵys aıtamyn. Bizdiń aýylda osyndaı ózgerister bolyp jatqanyna halyq óte qýanyshty.

Bizde aýyldyq okrýgte tórt mektep bar, onyń bireýi memlekettik tilde 2009 jyly ashyldy. Bul Qazaqstandaǵy dúngender arasyndaǵy alǵashqy qazaq mektebi. Biz memlekettik tildi úırenip jatyrmyz. Bizdiń jastarymyz biraz ýaqyttan keıin qazaq tilin jetik biledi dep oılaımyn», - deıdi aýyl aqsaqaly.

Aýyldaǵy №13 orta mekteptiń dırektory Qambar Imanqulovtyń aıtýynsha, atalǵan bilim oshaǵynda 936 bala oqıdy. Bul balalardyń ishinde tek 34 balanyń ǵana ulty qazaq.

Alaıda sabaq barlyq bilim alýshyǵa qazaq tilinde júrgiziledi eken. Bizben kezdesýde atalǵan orta mekteptiń 9-synyp oqýshysy, dúngen ultynyń ókili Zeınep Hıba qazaq tilin jaqsy kóretinin, qurmetteıtinin, sol úshin memlekettik tildi úırengenin aıtyp, aqıyq aqyn Muqaǵalı Maqataevtyń bir óleńin oqyp berdi.

Masanshy aýylynyń baıyrǵy turǵyny Erǵazy Boshaev BAQ ókilderine búginde aýyl turǵyndarynyń beıbit ári tatý-tátti ómir súrip otyrǵanyn jetkizdi. Aýyldaǵy jaımashýaq tirshilik jalǵasýda.