Masań kúıde ustalǵan ımamnyń ne ishkeni týraly aqparat joq – QMDB

<p>ASTANA. KAZINFORM &ndash; Qostanaı oblysynyń bas ımamy Bahytbek Tájimbetti tártip saqshylary Býrabaıdaǵy &laquo;Regıon&raquo; túngi klýbynyń janynda &laquo;Haılander&raquo; kóligimen ketip bara jatqanda qolǵa túsirgen. Keıin óńirdiń bas ımamy jumystan qýyldy.&nbsp;</p>

Oqıǵanyń mán-jaıyn bilý maqsatynda Qazaqstan musylmandary Dinı basqarmasyna redaktsııalyq saýal joldaǵan edik.

«Qostanaı oblysy boıynsha burynǵy ókil ımam Baqytbek Tájimbettiń Býrabaıda qandaı sýsyn ishkendigi jóninde bizde naqty aqparat joq», - deıdi Dinı basqarmadan.

Aıta keteıik, áleýmettik jelide taraǵan jazbada ımam tártip saqshylaryna qymyz ishtim degen. 

Osy oraıda QMDB, qymyz – bıeniń sútinen daıyndalatyn tabıǵı ónim jáne ejelden kele jatqan qazaqtyń dástúrli sýsyny bolǵandyqtan ıslam sharıǵaty qymyz ishýge tyıym salmaıtyndyǵyn habarlap otyr.

«Baqytbek Tájimbetke qatysty oqıǵaǵa baılanysty Qazaqstan musylmandary Dinı basqarmasy tóraǵasynyń bastamasymen ımamdarǵa qyzmettik etıka, din isiniń jáne jamaǵatpen jumystyń jaýapkershiligi jóninde arnaıy jınalys uıymdastyrylyp, nasıhat aıtyldy. Din qyzmetkerlerine, oblys bas ımamdaryna naqty tapsyrmalar berilip, rýhanııat isine yjdahattylyqpen qaraýǵa shaqyryldy», - delingen resmı aqparatta.

Dinı basqarmanyń málimetinshe, ımamdar men meshit qyzmetkerlerin jumysqa qabyldaý úshin qoıylatyn talaptar 2023 jylǵy 15 naýryzda Qazaqstan musylmandary Dinı basqarmasy ǵulamalar keńesiniń XXXVII májilisinde bekitilgen «Dinı qyzmetkerlerdiń laýazymdyq mindetteri» atty kontseptýaldy qujatpen retteledi. Atalǵan qujat QMDB-nyń resmı saıtynda (muftyat.kz) qoljetimdi.

Eske salsaq, 25 shildede Býrabaıda masań kúıde kólik júrgizgen Qostanaıdyń bas ımamy ustalǵanyn jazǵan bolatynbyz. Polıtsııa óńirdiń bas ımamyna qatysty ákimshilik hattama toltyrǵan. 

Sol kúni Qazaqstan musylmandary dinı basqarmasy mas kúıinde ustalǵan Qostanaı ımamyn jumystan shyǵarǵanyn habarlap, elden keshirim surady.

Odan bólek, masań kúıde ustalǵan ımamnyń 7 jylǵa kólik júrgizý quqyǵynan aırylǵany týraly habarlaǵan bolatynbyz.