Masań kúıde kólik júrgizetin astanalyqtardyń qatary azaımaı otyr – Polıtsııa departamenti

NUR-SULTAN. QazAqparat – Elordada ishimdik iship kólik basqaratyn jolaýshylar máselesi alańdatýshylyq týǵyzýda. Bul týraly qalalyq polıtsııa departamentiniń basshysy Marat Tólebaev málim etti, dep habarlaıdy QazAqparat tilshisi.

«Kólik quraldaryn masań kúıde júrgizý faktileri aıtarlyqtaı alańdatady. Masań kúıde kólik júrgizgeni úshin jaýaptylyqtyń kúsheıtilgenine qaramastan, osy ýaqytqa deıin 1 892 mas júrgizýshi ustaldy. Buǵan deıin kólik júrgizý quqyǵynan aıyrylǵan 1 382 júrgizýshi ákimshilik qamaýǵa alyndy. Sondaı-aq, jol-kólik oqıǵasyna kináli degen 33 júrgizýshi qylmystyq jaýapqa tartyldy», - dedi Marat Tólebaev elorda jurtshylyǵymen kezdesý barysynda.

Osy oraıda departament basshysy jol qaýipsizdigin qamtamasyz etý polıtsııa qyzmetindegi basym baǵyttardyń biri ekenin taǵy bir eske saldy.

Sonymen qatar qalada halyqaralyq tájirıbeni eskere otyryp, jol qaýipsizdigi boıynsha keshendi jospardyń iske asyp jatqany aıtyldy.

Buǵan deıin elordada qylmys jasaý deńgeıiniń 5,5 paıyzǵa azaıǵany týraly habarlaǵan edik.

Aıta ketsek, búgin Nur-Sultan qalasy polıtsııa departamentiniń basshysy, polıtsııa general-maıory Marat Tólebaev «Zoom» platformasynda halyq aldynda esep berdi.

Shara barysynda elorda turǵyndary tolǵandyrǵan saýaldaryn qoıyp, ótinish, usynystaryn jetkizdi.