Mas kúıinde rýlge otyrǵan aqtóbelik eks-depýtat qamaýǵa alyndy

<p>Aqtóbe qalalyq máslıhatynyń burynǵy depýtaty Sanııa Muratova keshe sot qaýlysymen 15 táýlikke qamalýy tıis edi. Oblystyq PD baspasóz qyzmeti qaýly oryndalyp, ol ákimshilik qamaqqa alynǵanyn málimdedi, dep habarlaıdy Kazinform.</p>

Aqtóbe qalalyq máslıhatynyń eks-depýtaty Sanııa Muratovaǵa QR Ákimshilik quqyqbuzýshylyq týraly kodekstiń 596-babynyń 3-bóligi (Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý) jáne 608-babynyń 1-bóligi (Kólik quralyn mas kúıde júrgizý) boıynsha hattama toltyrylyp, keshe sot qaýly shyǵardy.

Sýdıa Qaıyrjan Alashuly Sanııa Muratovanyń kinási hattamamen, medıtsınalyq saraptama qorytyndysymen, beınejazbamen tolyq dáleldengenin aıtyp, 15 táýlikke qamaqqa alý jáne júrgizý kýáliginen 7 jylǵa aıyrý týraly qaýlysyn shyǵardy. Ákimshilik qamaqqa alý Aqtóbe oblystyq PD-ne júkteldi.

- Sanııa Muratova 26-qazan kúni keshke Aqtóbe qalalyq polıtsııa basqarmasynyń ákimshilik qamaqqa alý arnaıy ornyna qamaldy. 15 táýlikke qamaldy. Odan ózge aqparat taratylmaıdy,- dedi oblystyq PD baspasóz qyzmetiniń jetekshisi Erbolat Sarqulov.