Mas kúıinde kólik júrgizý qasaqana jasalǵan qylmyspen teń - I. Merkel

ASTANA. QazAqparat - Mas kúıinde kóliktiń rýline otyrý qasaqana jasalǵan qylmyspen teń. Búgin Parlament Májilisiniń jalpy otyrysynda Qazaqstan Respýblıkasynyń Qylmystyq kodeksiniń jobasyn birinshi oqylymda talqylaý barysynda QR Bas prokýrorynyń birinshi orynbasary Iogan Merkel osylaı málim etti.

Toqtala ketetin jaıt, jańa redaktsııadaǵy Qylmystyq kodeks jobasynda jol-kólik oqıǵalaryna, onyń ishinde mas kúıinde rýlge otyryp, kisi ólimine soqtyratyn oqıǵalar týdyrǵandarǵa qatysty jaza kúsheıtiledi. Bul rette kisi ólimine soqtyratyn asa aýyr qylmystarǵa qatysty taraptardyń ortaq kelisimge kelýi, mámileler jasasýy alynyp tastalmaq.

«Mas bolyp, jol-kólik oqıǵalaryn jasaıtyndarǵa kóptegen elder jaýapkershilikti qataıtty. Eger adam rýlge otyrmas buryn spırttik ishimdikter ishken bolsa, osynyń ózi onyń ádeıi qylmysqa barǵanyn kórsetedi. Al jaýapkershilikti arttyrý júrgizýshilerdiń tártibin kúsheıtpek», - deıdi I. Merkel.

Budan bólek, Bas prokýrordyń birinshi orynbasary mas kúıinde kólikti basqarý faktileri kóptep kezdesetinin aıtyp: «sondyqtan da biz buny qasaqana jasalatyn qylmystar qataryna jatqyzyp otyrmyz» dedi.

«Endigide, mas kúıinde kóligimen kisi ólimine soqtyrǵan jol oqıǵalaryn jasaǵandar úshin taraptardyń ózara kelisýine jol berilmeıdi. Biz ondaılar úshin kólik júrgizý kýáliginen aıyrý merzimin de uzartyp otyrmyz. Qazir bizde qalaı? Adam jol-kólik oqıǵasyn jasasa da, onyń kólik júrgizýge qatysty quqyǵy sol qalpynda nemese qarastyrylmaǵan kúıi qalady. Sol úshin biz bul máseleni mindetti túrde qarastyrýdy engizdik, ondaılar mindetti túrde júrgizýshi quqyǵynan aıyrylatyn bolady», - dedi I. Merkel.