Mas kúıde bolǵan Qytaıdyń 4 azamaty Almaty áýejaıynda reısten túsirildi

ALMATY. QazAqparat – Qytaı Halyq Respýblıkasynyń tórt azamaty Almaty qalasy áýejaıynda reısten túsirildi. Polıtsııa málimetinshe, olar masań kúıde bolyp, aınaladaǵy adamdardyń mazasyn alǵan, dep habarlaıdy QazAqparat Rolisia.kz-ke silteme jasap.

Bıylǵy 26 sáýirde Almaty qalasy áýejaıyndaǵy jelilik polıtsııa bólimine Air Astana kompanııasynyń ókilinen Almaty – Atyraý reısimen ushpaqshy bolǵan jolaýshylar turaly habarlama túsken.

Tekserý barysynda Qytaıdyń 28, 32, 38 jáne 42 jastaǵy azamattary anyqtaldy.

«Aryz túsirýshiniń aıtýynsha, reıske tirkelý kezinde olar ózderin dóreki ustaǵan, masań kúıde bolǵan, balaǵat sózder aıtyp, ortaq paıdalanýǵa arnalǵan oryndy lastaǵan.
Medıtsınalyq kýálandyrý nátıjesinde quqyqbuzýshylar «ortasha» dárejedegi alkogoldi masań kúıde bolǵany anyqtaldy.
Shetel azamattaryna qatysty QR Ákimshilik quqyq buzýshylyq týraly kodekstiń 440-baby 1-bóligi (alkogoldik ishimdikterdi ishý nemese qoǵamdyq oryndarǵa masań kúıinde kelý) boıynsha ákimshilik hattama toltyrylyp, árqaısysyna 5 aılyq eseptik kórsetkish (17 250 tg) mólsherinde aıyppul salyndy.
Іs sheshim qabyldaý úshin Almaty qalasynyń mamandandyrylǵan aýdanaralyq ákimshilik sotyna joldandy», - delingen polıtsııa málimetinde.