Mas bolǵandardyń bárin bólimshege jetkizýdiń qajeti joq - Ákimshilik polıtsııa

ASTANA. QazAqparat - QR ІІM Ákimshilik polıtsııa komıtetiniń tóraǵasy Igor Lepexa mereke kúnderi mas bolǵan adamdardy ustap áketýge qatysty túsinik berdi, dep xabarlaıdy QazAqparat tilshisi.

«Shyny kerek, qazirdiń ózinde biz jeke quramǵa mádenıetti ári sypaıy bolyńdar dep, únemi aıtamyz. Kadr qyzmeti de, jeke qaýipsizdik qyzmeti de osy jumysqa atsalysady. Iá, adam qatty mas bolmasa, qoǵamdyq tártipti buzbasa, ony ustap áketýge qaqymyz joq. Biz ondaı faktilerdi únemi tekserip otyramyz. Kináli qyzmetkerler jaýapqa tartylady», - dedi I.Lepexa Astanada ótken baspasóz máslıxatynda.

Onyń aıtýynsha, Astana kúnin toılaý kezinde komendanttyq patrýlder de qyzmet atqaratyn bolady. Olar quqyq qorǵaýshylardyń jumysyn baqylaıdy. «Negizi, mereke kúnderi biz jeke quramǵa bylaı dep aıtamyz: «Eger adamdy bólimshege jetkizýdiń qajeti bolmasa, onda ákelmeı-aq qoıyńdar». Biraq ártúrli jaǵdaılar bolady. Adam mas bolyp, basqa bireýlerge qaýip tóndirmese, ózi de qylmystyń qurbanyna aınalmasa, ony ishki ister bólimshesine jetkizýdiń qajeti joq», - dep atap kórsetti I.Lepexa.

Aıta keteıik, Astana kúni qarsańynda elordanyń quqyq qorǵaýshylary, sondaı-aq úsh oblystyń jeke quramy kúsheıtilgen rejimge kóshetin bolady. QR ІІM memlekettik til jáne aqparat departamentiniń dırektory Almas Sádýbaevtyń aıtýynsha, 27 maýsym men 8 shilde aralyǵynda astanalyq garnızon, sondaı-aq Aqmola, Qaraǵandy jáne Pavlodar oblystarynyń jeke quramy kúsheıtilgen rejimge kóshiriledi.