Marsta NASA-nyń Kún batareıalarymen jumys isteıtin apparaty iske qosyldy

ASTANA. QazAqparat - AQSh-tyń Ulttyq áýede ushý jáne ǵarysh keńistigin zertteý basqarmasy (NASA) InSight apparaty Marsqa qondy. Apparat kún batareıalary ashylyp, Qyzyl ǵalamshardyń betinde Kún sáýlesinen zarıad ala bastaǵany týraly Jerge belgi jiberdi, dep habarlaıdy «QazAqparat» NASA-ǵa silteme jasap.

Apparat 26 qarasha kúni Marsqa qonyp, alǵashqy sýretterin jiberip úlgergen.

«InSight komandasy búgin alańsyz uıyqtaı alady. Kún batareıalary ashylyp, qýat ala bastady. Erteń InSight ǵalamshar betin zertteýge kirisedi», - deıdi NASA ókili, osy jobanyń menedjeri Tom Hoffman.

Ǵarysh apparaty Kún batareıalarynyń eni 2,2 metr. Mars Kúnnen Jerge qaraǵanda alysta ornalasqandyqtan, onyń betinde Kún sáýlesi Jerdegiden álsiz. Biraq apparat ǵalamshardy zertteýi úshin aspan ashyq kúnderi 600-700 Vatt shamasynda energııa alýynyń ózi jetkilikti. Panelderdi shań jaýyp qalsa da, 200-300 Vatt shamasynda energııa berýge qaýqarly.

Aldaǵy kúnderi fotoapparat bekitilgen mehanıkalyq manıpýlıator iske qosylyp, Marstyń topyraǵynyń sýretterin jiberedi. Soǵan qaraı NASA ınjenerleri zertteý júrgiziletin aımaqty anyqtaıdy. Al arnaıy burǵy «marsty» 5 metr tereńdikke deıin qazý múmkindigin beredi.

InSight zondy Marsqa jetý úshin 458 mıllıon kılometr ushqan. Ústimizdegi jyldyń mamyrynda Kalıfornııadan ushqan apparat Marstaǵy Elızıým taýly qyratyna qondy. NASA-nyń aqparatyna súıensek, apparat eki jyl boıy Qyzyl ǵalamshardy zertteıdi.