Marsqa ushqan ǵaryshkerler tiri qalmaıdy - NASA qorytyndysy

ASTANA. 2 maýsym. QazAqparat - Marsqa ushatyn ǵaryshkerler asa úlken kólemdegi radıatsııalyq sáýlelerdiń saldarynan qaterli isikke shaldyǵyp, kóp uzamaı ajal qushady. Sondaı-aq olardyń kózi men júıke júıesi de zardap shegedi. Curiosity qurylǵysynyń qyzyl ǵalamshardan jibergen málimetterine qorytyndy jasaǵan NASA mamandary osyndaı pikirge kelip otyr, dep habarlaıdy BBC.

Marsqa jetý úshin astronavtarǵa 360 kún qajet bolady, osy aralyqta olar ádettegi ǵaryshkerlerden alty ese kóp radıatsııa alady. Sonymen qatar ǵalamshardyń betinde de adam ómirine qaýipti sáýleler bar kórinedi.

«Qazirgi jaǵdaıda adamdy Marsqa jiberý óte qaýipti» , - dep atap ótti Hıýstondaǵy ǵarysh ortalyǵynyń qyzmetkeri Edvard Sımones. Táýekeldi boldyrmaýdyń jalǵyz amaly - qyzyl ǵalamsharǵa deıin júretin ýaqytty qysqartyp, oǵan birneshe aptada jetý. Alaıda búginde ondaı jyldamdyqpen usha alatyn zymyrandy adamzat balasy oılap tapqan joq.

Esterińizge salaıyq, 22 sáýir kúni Mars One jobasy bastalǵan bolatyn. Onyń maqsaty - 2023 jyly Marsqa alǵashqy adamdardy attandyrý. Qyzyl ǵalamsharǵa atanatyn tórt astronavt sol jerge qonystanyp, qalǵan ómirin sonda ótkizedi. Aldyn ala jiberiletin robottar olarǵa úı salyp beredi. Ómirleriniń sońyna deıin Marsta ótkizýge bel býyp, osy jobaǵa qatysýǵa ótinish bildirip otyrǵandar sany búginde 80 myńǵa jetip qaldy.