Marokkoda jer silkinisinen 300-ge jýyq adam qaza tapty

RABAT. TASS – QazAqparat – Keshe Marokkoda bolǵan zilzala qurbandarynyń sany 300-ge jýyqtady. Bul týraly koroldiktiń ІІM málim etti, dep habarlaıdy QazAqparat TASS agenttigine silteme jasap.

Mekeme aqparaty boıynsha, Ál-Haýz, Marrakesh, Ýarzazat, Azılıal, Shıshaýa jáne Tarýdant provıntsııa men prefektýralarynda 296 adam mert bolǵan. Sonymen qatar 153 adamnyń zardap shekkeni rastaldy. Olar qazir aýrýhanada, qajet kómekti alyp jatyr, dedi ІІM ókilderi.

Jerasty dúmpýi koroldiktiń birneshe iri qalasynda, onyń ishinde Agadır, Kasablanka, Kenıtra, Rabat, Es-Sýveırada sezilgen. Qazir materıaldyq shyǵyn eseptelip, qutqarý qyzmeti úıindilerdi jınap jatyr. Qalalyq jáne oblystyq aýrýhanalarǵa zardap shekkender úzdiksiz túsip jatyr.

Marokko Ulttyq geofızıka ınstıtýtynyń málimeti boıynsha, keshe jergilikti ýaqytpen 23:11-de 7 baldyq zilzala bolǵan. Epıtsentri Marrakesh-Safı aýdanynyń quramyna kiretin Ál-Haýz provıntsııasyndaǵy Igıl aýdanynda boldy. Oshaǵy 8 shaqyrym tereńde jatyr. Eýropa-jerorta teńizi seısmologııa ortalyǵynyń aqparaty boıynsha, jer silkinisi magnıtýdasy 6,9 bolǵan, al epıtsentri Marrakeshten ońtústik-batysqa qaraı 77 shaqyrym jerde ornalasty.

Marokkoda buǵan deıingi joıqyn zilzala 2004 jyldyń 24 aqpanynda Ál-Hoseıma provıntsııasynda boldy. Sol kezde magnıtýdasy 6,3 baldyq jer silkinisinen 628 adam qaza tapqan edi.