Marketpleısterdegi taýarlardyń sapasyna qatysty suraq kóp – Premer-mınıstr

<p>ASTANA. KAZINFORM &ndash; Ótken jyly 2,7 mıllıardtan astam adam onlaın saýda jasaǵan. Elimizdegi elektrondyq saýdanyń qazirgi jaı-kúıi týraly Úkimet basshysy Oljas Bektenov aıtyp berdi.</p>

- Elektrondyq saýda – álemdik ekonomıkanyń mańyzdy segmenti. Ótken jyly 2,7 mıllıardtan astam adam taýarlardy onlaın satyp alǵan. Satylymdardyń jalpy somasy shamamen 6,3 trıllıon dollarǵa jetti. Onlaın saýda bizdiń elimizde de keńinen tanymal. Máselen, ótken jyly onyń kólemi 3,2 trıllıon teńgeden asyp, búkil bólshek saýdanyń 14,5% quraǵan. Bul sala 300 myńnan astam jumys ornyn qurýǵa múmkindik berdi.

Al eńbek ónimdiliginiń ósýi dúkender men bazardaǵy satylymdarǵa qaraǵanda 30% asyp ketti, - dedi Oljas Bektenov Úkimet otyrysynda. 

Premer-mınıstrdiń aıtýynsha, elektrondyq saýdanyń qarqyndy damýy ulttyq ekonomıkaǵa oń áser etedi.

- Bizdegi naryqtyń aýqymdy bóligin sheteldik ınternet-alańdar alyp jatyr. Olardy otandyq taýarlar eksportyn ulǵaıtý úshin tıimdi paıdalanýǵa bolady. Ekinshi jaǵynan, tutynýshylardyń quqyqtary men zııatkerlik menshikti jáne azamattardyń derbes derekterin qorǵaýǵa baılanysty másele týyndaıdy. Marketpleısterdegi taýarlardyń sapasyna qatysty da suraq kóp. Sheteldik alańdar túgili, otandyq marketpleıster de sapaǵa kepildik bere almaıdy. Ónimniń túpnusqalyǵy týraly aqparat kóbinese kórsetilmeıdi. Bul sapasyz taýar satyp alǵan tutynýshylarmen qatar, básekeli ári zańdy saýda úshin qaýipti, - deıdi ol. 

Buǵan deıin Saýda jáne ıntegratsııa mınıstri búginde strımıng arqyly saýda jasaý suranysqa ıe ekenin aıtqan edi.