Marqakól aýdanyn qalpyna keltirý tıimsiz - mınıstrlik

ASTANA. QazAqparat – Ulttyq ekonomıka vıtse-mınıstri Baýyrjan Omarbekov Shyǵys Qazaqstan oblysyndaǵy Marqakól aýdanyn qalpyna keltirý tıimsiz degen qorytyndy jasalǵanyn málim etti, dep habarlaıdy QazAqparat tilshisi.

«Taldaý kórsetkendeı, halyq sany az Marqakól aýdanyn qalpyna keltirý memlekettik qyzmetshilerdi ustaýǵa jumsalatyn shyǵyndardy qarjylandyra otyryp, olardyń sanyn ulǵaıtýdy talap etedi. Tek bir aýdanda derbes 20 memlekettik organ (9 aýdandyq bólim, 11 respýblıkalyq jáne oblystyq baǵynystaǵy bólim) qurý qajet bolady. Bul qosymsha 112 memlekettik qyzmetshi degen sóz. Birikken Kúrshim aýdanynyń (burynǵy Marqakól jáne Kúrshim aýdandary) halyq sany 23,5 myń adamdy quraıdy jáne 1997 jyldan bastap 25,4 myń adamǵa nemese 52,8%-ǵa qysqardy. Burynǵy Marqakól aýdanynyń aýyldarynda 8 725 adam turady.

Marqakól aýdany qalpyna keltirilgen jaǵdaıda, ákimshilik ǵımarattar salýǵa, memlekettik mekemelerdiń materıaldyq-tehnıkalyq bazasyn ustaýǵa jáne nyǵaıtýǵa aldyn ala esepteýler boıynsha shamamen 15 mlrd teńge bıýdjet qarajaty talap etiledi.

Memlekettik qurylymdardy qurýǵa jáne ustaýǵa jumsalatyn eleýli shyǵyndar, halyq sanynyń qysqarýynyń saqtalyp otyrǵan úrdisi kezinde taratylǵan Marqakól aýdanyn qalpyna keltirý ekonomıkalyq turǵydan tıimsiz dep paıymdalady», - dep jazady Baýyrjan Omarbekov.

Mundaı paıymdy 2020-2022 jyldary jumys istegen komıssııa shyǵarǵan kórinedi.

«2020-2022 jyldary quramynda ortalyq memlekettik organdar, oblys ákimdigi jáne jurtshylyq basshylary bar komıssııa shekara mańyndaǵy óńirlerdegi aǵymdaǵy jaǵdaıdy zerdeledi.

Aýdandardy qurýǵa jumsalǵan shyǵyndardy, halyq sanynyń azdyǵyn jáne aýmaqtardyń ınfraqurylymyn odan ári damytý, kásipkerlikti qoldaý jáne nátıjeli jumyspen qamtýdy qamtamasyz etý boıynsha qabyldanyp jatqan sharalardy eskere otyryp, komıssııa aýdandardy qalpyna keltirýdiń ekonomıkalyq tıimsizdigin atap ótti», - delingen resmı jaýapta.