Marına Venıng: Memlekettik tildi meńgerýdi árkim ózinen bastaýy tıis

NUR-SULTAN. QazAqparat – SQO Shal aqyn aýdanyndaǵy Esim Shaıkın atyndaǵy orta mekteptiń muǵalimi Venıng Marına Prezıdenttiń «Ana tili» gazetine bergen suhbatyn oqyp shyǵyp, maqaladaǵy bastamalardy tolyq qoldaıtynyn bildirdi, dep habarlaıdy QazAqparat tilshisi.

«Nemis ultynyń qyzy bolamyn. Men Qazaqstan azamaty bolǵandyqtan, ózimniń qazaqsha sóıleıtinime tańyrqaýǵa negiz joq dep esepteımin. Sebebi, búgingi tańda memlekettik til máselesi óte ózekti. Qazaqstannyń árbir azamaty memlekettik tildi, ıaǵnı qazaq tilin bilýi qajet. 2020 jyldyń 25 maýsymynda Qazaqstan Respýblıkasynyń Prezıdenti Qasym-Jomart Toqaev respýblıkalyq «Ana tili» gazetine bergen suhbatynda «Biz ózge ult ókilderin qoldaýymyz kerek. Mundaı azamattar qazaq tiliniń deńgeıin ultaralyq qoldanys dárejesine kóterýge kómektesedi» degen bolatyn. Men, Prezıdentimizdiń bul pikirimen tolyqtaı kelisemin. Óıtkeni, ózge ult ókilderi qazaq tiline naǵyz janashyr jandar. Olar qazaq tilin nasıhattap, túrli is sharalarǵa qatysýdan basqa, kúndelikti ómirde de qazaq tilinde sóıleıdi. Tipti, keıbir ózge ultty qurbylarym qazaq tilinde maqaldatyp, mándi sóılegende, talaı qazaqty shań qaptyrady», - deıdi Marına Venıng.

Marına ózi úshin qazaq tili tek jumys quraly ǵana emes ekenin jetkizdi.

«Qazaq tilin bilgenimniń arqasynda birshama jetistikterge jettim dep maqtanyshpen aıta alamyn. «Bilerim - bir toǵyz, bilmeıtinim- toqsan toǵyz» demekshi, bilgen saıyn bilmeıtinin kóp ekenin uǵa túsesiń. Sondyqtan da shyǵar belesterim áli alda. Memleket basshysy aıtqandaı: «Qazir toı qýalaıtyn emes, oı qýalaıtyn kezeńmen betpe-bet keldik. Bul dáýir - aqyl-oıdyń, ǵylym men bilimniń, eńbektiń dáýiri». Demek, memlekettik tildi meńgerýdi árkim ózinen bastaýy tıis», - deıdi ol.

Eske sala ketsek búgin respýblıkalyq «Ana tili» basylymyna Memleket basshysy Qasym-Jomart Toqaevtyń suhbaty jarııalanǵan edi.