Marıhýana satqan aqmolalyq zeınetker 12 jylǵa sottaldy

KÓKShETAÝ. QazAqparat – Aqmola oblysynyń qylmystyq ister jónindegi mamandandyrylǵan aýdanaralyq sotynda Şýche qalasynyń 63 jastaǵy turǵynyna qatysty qylmystyq is qaraldy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetinen málim etkendeı, kúdikti 22 jyldyń naýryz aıynda jalpy salmaǵy 16 keliden asatyn «keptirilgen marıhýana» esirtki zatyn zańsyz ótkizý kezinde ustalǵan. Ol esirtki satqany úshin buǵan deıin de isti bolǵan.

«Zeınetker jedel-izdestirý is-qımyldarynyń ádisteri týraly óte jaqsy bildi. Sol sebepti, óte saq boldy, jaldamaly páterlerdi paıdalandy, esirtki satyp alýshylarmen áńgimelesý kezinde jargon qoldandy», - dedi vedomstvodan.

Sot otyrysynda aıyptalýshy jasaǵan qylmysyn moıyndamady. Biraq onyń kinási sot otyrysynda zerttelgen dálelder arqyly tolyq rastaldy.

«Sot úkimimen 63 jastaǵy sottalýshy Qylmystyq kodekstiń 297-baby 3-bóligi boıynsha kináli dep tanylyp, qaýipsizdigi eń joǵary qylmystyq-atqarý júıesi mekemesinde jazasyn óteı otyryp, 12 jyl merzimge bas bostandyǵynan aıyryldy», - dep tolyqtyrdy vedomstvodan.

Er adam sot úkimine apellıatsııalyq shaǵym bergen. Alaıda sheshim ózgerissiz qaldy.