Marat Jákıev «Astana-Arlans»-tyń bas jattyqtyrýshysy bolyp taǵaıyndaldy

ASTANA. QazAqparat - «Astana-Arlans» komandasynyń bas jattyqtyrýshysy qyzmetine Marat Jákıev taǵaıyndaldy, dep habarlady klýbtyń baspasóz qyzmetinen.

Marat Isaǵalıuly 1968 jyly 12 qyrkúıekte Mańǵystaý oblysynda dúnıege kelgen, joǵary bilimi bar.

1986 jyldyń 12 mamyrynan KSRO sport sheberi, bokstan KSRO quramasynyń múshesi. Bokspen 1980-1997 jyldar aralyǵynda aınalysqan. 2005 jylǵy álem jáne Azııa chempıony E.Jańabergenovtyń, 2012 jylǵy Olımpıada oıyndarynyń kúmis júldegeri, 2014 jylǵy Azııa oıyndarynyń chempıony Á. Nııazymbetovtiń jattyqtyrýshysy.

Klýbtyń qamqorlyq keńesiniń sheshimimen «Astana-Arlans»-tyń bas dırektory bolyp 2012 jylǵy Olımpıada oıyndarynyń jeńimpazy Serik Sápıev taǵaıyndaldy. Serik Jumanǵalıuly óz qyzmetine aǵymdaǵy jyldyń sońynda, Anglııadaǵy oqýyn aıaqtaǵannan keıin kirisedi.

Eske sala keteıik, klýbtyń burynǵy bas dırektory B. Mankenov pen Bas jattyqtyrýshy S. Korchınskıı 2014 jyldyń qarasha aıynyń basynda óz erikterimen otstavkaǵa ketýge ótinish bildirgen bolatyn.