Marat Tólebaev elorda Polıtsııa departamentiniń bastyǵy bolyp taǵaıyndaldy

NUR-SULTAN. QazAqparat - Prezıdenti Ákimshiliginiń kelisimi boıynsha Іshki ister mınıstri Erlan Turǵymbaevtyń buıryǵymen Nur-Sultan qalasy Polıtsııa departamentiniń bastyǵy laýazymyna Marat Tólebaev taǵaıyndaldy, dep habarlaıdy QazAqparat tilshisi.

Búgin ІІM basshysy ony jeke quramǵa tanystyrdy. Buǵan deıin osy qyzmetti atqarǵan Erjan Sadenov QR Prezıdentiniń Ókimimen jaqynda Іshki ister mınıstriniń orynbasary bolyp taǵaıyndaldy. Mınıstr Erjan Sadenovtyń basshylyǵymen Nur-Sultan qalasynyń Polıtsııa departamenti qoǵamdyq qaýipsizdik pen quqyqtyq tártipti qamtamasyz etý boıynsha oń nátıjelerge qol jetkizgenin atap ótip, atqarylǵan jumys úshin alǵysyn bildirdi.

«Elordamyz qarqyndy ósip, damyp keledi, onyń turǵyndary men qonaqtarynyń qaýipsizdigin qamtamasyz etý óte mańyzdy. Aýmaqtyq bólimsheni basqarýda mol tájirıbesi bar Marat Tólebaev Memleket basshysynyń ishki ister organdarynyń aldyna qoıǵan mindetterin oryndaý jumystaryn, onyń ishinde halyqpen ózara is-qımyldyń servıstik modeline kóshý, polıtsııa qyzmetin tsıfrlandyrý jáne qylmysqa qarsy kúresti tıisti deńgeıde jalǵastyratynyna senimdimin. Elordamyz álemdegi eń qaýipsiz qalalardyń qatarynda bolýy tıis», – dedi mınıstr Erlan Turǵymbaev.

QR Іshki ister mınıstrliginiń málimetinshe, Marat Saǵyntaıuly Tólebaev 1969 jyly týǵan. Іshki ister organdaryndaǵy qyzmetin Qostanaı oblysynda qylmystyq izdestirý jedel ýákili laýazymynan bastady. Ár jyldary elordada Polıtsııa departamentiniń bólimshelerinde basshylyq qyzmetterdi atqardy. Qostanaı oblysy jáne Nur-Sultan qalasy Polıtsııa departamenti bastyǵynyń birinshi orynbasary bolyp jumys istedi. 2019 jyldan bastap Soltústik Qazaqstan oblysynyń Polıtsııa departamentin basqardy. Polıtsııa general-maıory arnaıy ataǵy bar.