Marat Qojaev satýshydan gúl tartyp alǵan polıtseı jaıly: Ol da qoǵam múshesi
«Biz osy bolǵan oqıǵa týraly sizder sııaqty ınternetten kórdik, bildik. Sol kúni tekseris bastaldy. Ózderińizge málimdeme berdik. Ol polıtsııa qyzmetkeriniń qylyǵy boıynsha qylmystyq is qozǵaldy. Jábirlenýshiniń aryzy ýaqytynda qabyldanbaǵany úshin ózindik qaýipsizdik qyzmetiniń qyzmetkerleri ol jaqqa bardy, qazir tekserý júrip jatyr. Olardyń da jaýapkershiligi qaralady», - dedi Marat Qojaev Úkimet otyrysynan keıin BAQ ókilderiniń saýalyna oraı.
Sonymen qatar M.Qojaev kúdikti prokýratýra qyzmetkeri emestigin aıtty.
«Iá, olardyń qyzmetkeri emestigin rastaımyn. Gúldi alyp ketken azamattyń sol ýaqytta ýchaskelik polıtsııa bolǵandyǵy shyn. Reforma júrgizip jatyrmyz. Qyzmetkerlerimiz bizge aspannan túsken joq. Olar da qoǵam músheleri. Qoǵamda qandaı protsester oryn alsa, polıtsııa qatarynda da sondaı júredi. Bizde 126 myńnan astam qyzmetker bar. Olardyń arasynda túrli jaǵdaı bolyp turady», - dedi ol.
Eske salaıyq, Shymkenttegi «Romantic» gúl dúkeniniń jumysshylaryna qoqan-loqy kórsetken er adamdar týraly vıdeo taraǵan bolatyn.
Olardyń biri prokýratýra qyzmetkeriniń uly ekeni týraly aqparatty Shymkent qalasynyń prokýratýrasy joqqa shyǵardy.
Gúl satýshyny urǵan buzaqynyń qasyndaǵy ekinshi adam Eńbekshi aýdany boıynsha memlekettik kirister basqarmasy basshysynyń orynbasary ekeni anyqtaldy. Ol qyzmet ornynda qatań sógis aldy.
Keıin Іshki ister mınıstrligi Shymkenttegi gúl dúkeninde eki bólek oqıǵa bolǵanyn habarlap, ár jaıt boıynsha resmı aqparattandyrdy.