Marat Qalqabaev isti bolǵan Másimovtyń múlkine qatysty pikir bildirdi
Búgin Májiliste ótken baspasóz máslıhatynda tilshiler M.Qalqabaevtan K.Másimov isi boıynsha surady.
«Bul suraqtardy sotqa joldaý kerek. Biz aldyn ala tergeýmen aınalystyq, ony aıaqtap, sotqa jiberdik. Sot sheshimin ózderińiz bilesizder», — dedi Marat Qalqabaev.
Sonymen qatar «onyń múlkin kim satady» degen suraqqa UQK tóraǵasynyń orynbasary bul máselemen sot oryndaýshylar aınalysyp jatyr dep jaýap berdi.
«Sot sheshiminen keıin sot oryndaýshylary aınalysady», - dep túsindirdi Marat Qalqabaev.
Ol qupııa derekterdiń jarııalanbaıtynyn alǵa tartyp, istiń basqa málimetterin aıtýdan bas tartty.
«Іs óte qupııa, biz eshteńeni jarııa ete almaımyz», - dep qosty Marat Qalqabaev.
Budan buryn habarlanǵandaı, bıyl sáýir aıynda Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komıtetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojınge, M.Osıpovke qatysty qylmystyq is boıynsha úkimin jarııa etti.
Sot sheshimimen atalǵan úsh bap boıynsha da kináli dep tanylǵan K.Másimov - 18, A.Sadyqulov - 16 jylǵa, D.Erǵojın taǵylǵan aıyptarǵa sáıkes - 15 jylǵa, M.Osıpov bolsa bılik pen laýazymdyq ókilettigin asyra paıdalaný babymen 3 jylǵa bas bostandyǵynan aıyryldy. Sottalýshylardyń barlyǵy ómir boıy memlekettik qyzmette laýazym ıelene almaıdy. Sonymen qatar barlyǵy general shenderinen jáne memlekettik nagradalarynan aıyrylady.