Marat Beketaev: Partııa qurý týraly ótinimder kelip tústi

NUR-SULTAN. QazAqparat – Ádilet mınıstri Marat Beketaev buǵan deıin partııa qurý týraly ózi jetekshilik etetin mınıstrlikke ótinim túskenin málim etti, dep habarlaıdy QazAqparat tilshisi.

«Shynynda da ótinimder kelip tústi. Biraq men olardy oppozıtsııalyq dep atamas edim. Adamdar toby saıası partııa qurǵysy keletini jóninde Ádilet mınıstrligine suranys joldady. Bul ótinimder zańnama talaptaryna saı bolǵan joq. Sol sebepti olardy tirkeýden bas tartyldy. Bul adamdar toby qatelikti qaıta túzep, ótinim joldaı alady», - dedi Marat Beketaev OKQ-da ótken baspasóz máslıhatynda.

Áıtse de mınıstr partııa qurý – ońaı sharýa emes ekenin eske saldy.

«Bul – óte qymbatqa túsetin protsess. Búgin partııa qurý bastamasyn oılaǵan adam erteń ony qura salmaıdy. Ol abyroıly ári artynan eretin adamdary bar ekenin, saıası partııany qura alatyn resýrsy baryn dáleldeýi tıis. Zań talaptary osyndaı. Qansha adamnan partııa qurý týraly usynys túskenin, qaı adam túsirgenin aıta almaımyn. Maǵan bul málimetterdi taratýǵa zań ruqsat bermeıdi. Sebebi bul – ótinimdi bergen sol adamdar tobynyń quqyǵy. Ádilet mınıstrligi mundaı málimetterdi jarııalaı almaıdy», - dedi ol.