Marat Beketaev: Kez kelgen problema jurtshylyq talqylaýyna usynylady

NUR-SULTAN. QazAqparat – Zań jobalary boıynsha ǵylymı-quqyqtyq saraptamany ǵylymı uıymdar emes tizilimdegi sarapshylar júrgizetin bolady. Bul týraly Ádilet mınıstri Marat Beketaev málim etti, dep habarlaıdy QazAqparat tilshisi.

Normashyǵarmashylyq qyzmetin jetildirý maqsatynda zań shyǵarý protsesiniń jańa satylaryn engizýdi kózdeıtin zań jobasy ázirlendi. Atap aıtqanda, kez kelgen problema birinshi kezekte, jurtshylyqpen talqylanatyn bolady jáne qoǵamdyq talqylaý nátıjelerin alǵannan keıin ǵana ázirleýshi zań jobasyna qatysty máseleni sheshedi.

Bar problema boıynsha barlyq taldaý jáne qoǵamdyq talqylaý nátıjeleri jeke qujatta kórinis tabýy tıis. Bul qujat jurtshylyqtan keri baılanys alý jáne bekitý úshin jasalady.

Mınıstrdiń aıtýynsha, memlekettik satyp alý negizinde ǵylymı quqyqtyq saraptama júrgizýge uıymdardy tartýdan bas tartý jáne Zańnama jáne quqyqtyq aqparat ınstıtýty júrgizetin tıisti tizilimnen naqty sarapshylardy taǵaıyndaýǵa kóshý usynylady.

Bul óz kezeginde, ázirlenip jatqan NQA jobalarynyń sapasyn arttyrýǵa yqpal etedi.