Marat Báshimov: Karantın sharalaryn eki aptaǵa uzartý – óte mańyzdy ári kerekti sheshim

NUR-SULTAN. QazAqparat – Ulttyq qoǵamdyq senim keńesiniń múshesi, Eýropalyq quqyq jáne adam quqyqtary ınstıtýtynyń dırektory Marat Báshimov Prezıdent karantın sharalaryn eki aptaǵa uzartý tapsyrmasyna qatysty pikir bildirdi, dep habarlaıdy QazAqparat tilshisi.

«Mamyr aıynda shekteý sharalaryn jeńildettik te elde indet qaıta órship ketti. Shilde aıynyń basynda engizilgen karantın sharalary tamyzdyń basyna deıin uzartyldy. Bizdiń el sekildi basqa memleketter de amalsyz karantın merzimin uzartyp jatyr. Óıtkeni ol elderde de, bizdiń memlekette de pozıtıv bar desek te indettiń beti áli qaıta qoıǵan joq. Memlekettik organdar da aıylyn jıyp, halyq ta nazaryn bul máselege kóbirek bura bastady. Prezıdenttiń buǵan deıin Úkimetke jasaǵan eskertýin bilesizder. Áıtse de bizdiń elde indetti eńserdik dep aıta almaımyz. Sebebi kúnine 1500-ge tarta adamnan koronavırýs anyqtalýda», - dedi Marat Báshimov QazAqparat tilshisine telefon arqyly aıtqan pikirinde.

Onyń aıtýynsha, Prezıdenttiń karantın sharalaryn eki aptaǵa uzartýy – óte mańyzdy ári kerekti sheshim.

«Óıtkeni qazir jaǵdaıdy baqylaýdan jiberip alsaq, vırýs qaıta órship ketýi múmkin. Halyqqa kiná artyp jatqandardyń pikirimen kelise qoımaımyn. Áıtse de vırýsqa áli de senbeı júrgender bar. Ókinishtisi, kóshede maskasyz, áleýmettik qashyqtyqty saqtamaı júrgenderdi áli kórip júrmiz. Sondyqtan karantın sharalaryn menińshe qatań saqtaýdy eki aptaǵa taǵy uzartý kerek. Bul durys sheshim», - dep qaıtalady sózin ol.

Eske sala ketsek, búgin Memleket basshysy Qasym-Jomart Toqaev epıdemıologııalyq ahýaldy turaqtandyrý jóninde keńes ótkizip, karantın sharalaryn eki aptaǵa uzartýdy tapsyrǵan bolatyn.