Marat Ahmetjanov Qosshydaǵy jedel járdem kóliginiń tapshylyǵyn qalaı sheshetinin aıtty

<p>Bıyl Aqmola oblysynyń ákimi Marat Ahmetjanov ortalyq kommýnıkatsııalar qyzmetinde ótken brıfıngide Qosshy qalasyndaǵy jedel járdem kóliginiń tapshylyǵyn qalaı sheshetinin aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Resmı derek boıynsha, Qosshy qalasynda 52 myń adam turady. Al shyn máninde halyq sany 100 myńnan asyp ketken. Normatıv boıynsha ár 10 myń adamǵa 1 sanıtarııalyq avtokólik bolý kerek. Sonda jedel járdem kóliginiń sany qajettilikten eki ese az degen sóz. Osy problemalardy sheshý úshin bizdiń aldymyzda aglomeratsııa ortalyǵy men irgeles eldi mekenderdiń arasynda teńgerim ornatý kerek. Osyǵan baılanysty jańa Keshendi jospar ázirlendi. Ol jospardyń aıasynda 300 is-shara kózdelgen. Onyń ishinde ınvestorlardyń jeke qarajatyna iske asyrylatyndary da bar. Astana ákimi ekeýimizdiń aramyzda Astana kásipkerlerine bizdiń óńirde erekshe jaǵdaı jasaý týraly kelisim bar. Mysaly, Aqmola oblysynyń aýmaǵyna kiretin Astanaǵa irgeles eldi mekenderden astanalyq ınvestorlarǵa jer telimderin berý kózdelip otyr.
Osylaısha óńirdiń aýyl sharýashylyǵyndaǵy áleýeti keńinen paıdalanylady. Ol qarapaıym halyq úshin jumys oryndary degen sóz», - dedi ákim.

Onyń sózinshe, elorda aglomeratsııasyn damytý baǵytynda ózekti problemalar barshylyq.

«Kún saıyn elordaǵa irgeles aýyldardan 200 myń adam, 30 myń kóli kiredi. Resmı málimet boıynsha, aglomeratsııa aýmaǵynda 180 myń adam, naqty jaǵdaıda 300 myń adam turyp jatyr.  Bul bıýdjetti josparlaý kezinde jáne áleýmettik nysandar salý máselesinde belgili bir qıyndyqtar týyndatady. Sonyń da áserinen bizdiń óńir respýblıka bıýdjetinen dotatsııa alatyn oblystardyń biri bolyp keledi», - dedi Marat Ahmetjanov.