Marat Ahmetjanov qazaqstandyqtardyń sheteldik shottary qalaı baqylaýǵa alynatynyn aıtty

NUR-SULTAN. QazAqparat – Sybaılas jemqorlyqqa qarsy is qımyl agenttiginiń tóraǵasy Marat Ahmetjanov shetelge aqsha jylystatýdyń jolyn kesetin tásil qolǵa alynǵanyn aıtty, dep habarlaıdy QazAqparat.

«Qazaqstan Ekonomıkalyq yntymaqtastyq jáne damý uıymynyń salyq aqparatyn avtomatty túrde alýǵa bolatyn dúnıejúzilik júıege qosylyp jatyr. Onyń kómegimen biz sheteldik shottar men aktıvter týraly málimetter alý múmkindigine ıe bolamyz. Endi jemqorlar aqshany shetelde jasyra almaıdy», - dedi Marat Ahmetjanov agenttiktiń alqa májilisinde.

Onyń aıtýynsha, agenttik Májiliske negizsiz baıý úshin jaýapkershilik engizýdi kózdeıtin zańnamalyq túzetýler engizgen.

«Túzetýlerdiń negizgi novellalarynyń biri negizsiz baıý úshin jaýapkershilikti engizý bolady. Bul bıyldan bastap iske qosylǵan jalpyǵa birdeı deklaratsııalaý tetiginiń logıkalyq jalǵasy bolyp tabylady», – dedi ol.