Maraldydaǵy altyn kenishiniń daýly máselesi zań sheńberinde ǵana sheshilýi tıis - ákim

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Kúrshim aýdany Maraldy aýylyndaǵy altyn óndirýshi kompanııaǵa qatysty daýly másele zań sheńberinde ǵana sheshilýi tıistigin aıtty, dep habarlaıdy QazAqparat tilshisi.

Byltyr Shyǵys Qazaqstan oblysy Kúrshim aýdany Maraldy aýylynyń halqy altyn óndirýshi kompanııanyń jumysyna narazylyq bildirip, ekologııanyń buzylyp jatqandyǵyna shaǵymdanǵan. Al aýyldyń bir top belsendisi kerisinshe, sol kompanııany qoldap, zańsyz altyn qazýshylardyń bar ekendigin aıtyp, Prezıdentke hat jazǵan edi.

Taıaýda Ekologııa jáne tabıǵı resýrstar mınıstrliginiń ókili ortalyq kommýnıkatsııalar qyzmetinde ótken brıfıngide Maraldy altyn kenishi týraly birneshe suraqqa jaýap bergen.

Osy máselege oraı búgin ShQO ákimi Danıal Ahmetov resmı málimdeme jasady.

«Maraldy aýylynda kúrdeli jaǵdaı qalyptasyp otyr. Aýyl turǵyndarynyń bir bóligi quramynda altyn bar kendi óńdeıtin altyn óndirý fabrıkasynyń qurylysyna qarsylyq bildirýde. Jobanyń bastamashysy - «VSAM Prodakshn» JShS.Aýyl turǵyndary fabrıka jumysy, onyń ishinde jarylys jumystary, mal jaıylymyna zııan keltirip, aımaqtyń ekologııasyna keri áserin tıgizedi dep alańdaýda. Fabrıkaǵa jáne onyń jumysyna qatysty kez kelgen sheshim, qatań túrde zań sheńberinde qabyldanady dep senimmen aıtamyn. Men Indýstrııa jáne ınfraqurylymdyq damý, Ekologııa jáne tabıǵı resýrstar, Aýyl sharýashylyǵy mınıstrlikterine birneshe ret hat joldadym. Onda jer qoınaýyn paıdalanýshylarǵa qatysty baqylaý júrgizý, ekologııalyq kelisimniń negizdiligine jáne qazirgi ýaqytta sot rásimderi júrip jatqan jer ýchaskelerin berýdiń zańdylyǵyna tekserý júrgizý qajettigine erekshe nazar aýdardym», - deıdi ol.

Qazirgi ýaqytta oblys ákiminiń orynbasary jáne jaýapty mamandar toby atalǵan mınıstrlikterde jumys júrgizip jatyr.

«Altyn óndirý fabrıkasynyń qyzmetinde qorshaǵan ortaǵa, adam densaýlyǵyna, qaýipsiz tehnologııalardy paıdalaný, onyń ishinde natrıı tsıanıdin qoldaný, ony aýystyrý múmkindigin qarastyrý jáne Maraldy aýyly mańyndaǵy karerdi qoldanysqa engizý áserin baǵalaý úshin táýelsiz ekologııalyq saraptama júrgizilýi tıis. Osy maqsatta L. Gýmılev atyndaǵy ýnıversıtet ǵalymdary tartyldy. Ǵylymı-zertteý jumysynyń nátıjesinen keıin tıisti qorytyndylar jasalady. Osylaısha, turǵyndardyń barlyq daýly jáne alańdaıtyn suraqtaryna jaýap alynady. Aldaǵy búkil is-qımyl tek zań aıasynda júzege asyrylady», - deıdi Danıal Ahmetov.