Maral ıshan Kenesaryǵa syılaǵan Quran kitaby Túrkistanǵa jetkizildi
QR Prezıdenti Qasym-Jomart Toqaev kıeli Túrkistanda Ulttyq quryltaıdyń «Ádiletti Qazaqstan – Adal azamat» atty ekinshi otyrysynda áıgili Maral ıshannyń Kenesary hanǵa syılaǵan Quran kitabyn Qoja Ahmet ıAsaýı kesenesine qoıýdy usynǵan edi. Osy oraıda búgin atalǵan Quran kitabyn Qoja Ahmet ıAsaýı kesenesine tapsyrý is-sharasy ótti.
Saltanatty sharaǵa Túrkistan oblysynyń ákimi Darhan Satybaldy, Qazaqstan Musylmandary Dinı Basqarmasynyń tóraǵasy, Bas múftı Naýryzbaı qajy Taǵanuly, Kenesary hannyń urpaqtary qatysty.
«Qazaqtyń 21 hany, sultandary men batyrlary jerlengen Qoja Ahmet ıAsaýı kesenesine osyndaı sırek jádigerdi ákelý – biz úshin úlken mártebe, maqtanysh. Bul – elimizdiń rýhyn kóteretin oqıǵa ekendigi anyq. Qalamyzǵa kelgen týrıster úshin Taıqazanmen qatar taǵy da bir elimizdiń mańyzdy, sırek jádigeriniń bolýy óte qýanyshty jaǵdaı. Qoja Ahmet ıAsaýıden bastaý alatyn qazaq jerindegi rýhanı sabaqtastyq qazirge deıin úzdiksiz jalǵasyp keledi. Biz qoǵamda qalyptasqan saıası turaqtylyqty, adamdardyń bir-birine degen meıirimdiligin saqtap, keler urpaqqa amanat etip qaldyrýǵa tıispiz. Osy kitapty elimizge qaıtarý úshin úlesin qosqan ulttyń janashyr azamattaryna óz alǵysymdy aıtamyn», – dedi oblys ákimi.
Naýryzbaı qajy Taǵanuly babamyzdan jetken qundy jádigerdi Qazaqstan musylmandary dinı basqarmasy osy jyldyń maýsym aıynda qabyldap alǵanyn, Maral ıshannyń tek dindar ǵana emes, qoǵam qaıratkeri ekenine, atqarǵan ulaǵatty isterine toqtaldy.
«Qundy jádigerdiń Qoja Ahmet ıAsaýı babamyzdyń kesenesine qoıylýy dástúrli dinimizdiń mártebesiniń artyp, halqymyzdyń sanasynyń izgilikke ózgerýine yqpal etedi degen oıdamyz. Maral ıshan babamyz kim degende biz ony tek dindar ǵana emes, qoǵam qaıratkeri, azattyq úshin kúresken tulǵa retinde tanýǵa tıispiz. Maral ıshannyń aǵartýshylyq qyzmeti bir tóbe. Biz de búgin qundy murany handar men bıler, sultandar men rýhanı ustazdardyń Qııametke deıingi máńgilik turaǵy bolǵan kıeli mekenge alyp keldik. Álemniń ár qıyrynan Túrkistanǵa keletin kez-kelgen adam úshin bul taǵylymy mol, bereri kóp tarıhı dúnıe»,-dedi Bas múftı.
Sonymen birge Qazaqstan Respýblıkasy Mádenıet jáne aqparat mınıstrligi Din isteri komıtetiniń tóraǵasy Erjan Núkejanov ta bul jádigerdiń mańyzyna toqtaldy.
Rýhanı is-sharada ǵulama qarılar Quran hatym túsirdi. Bas múftı Quran kitapty «Áziret Sultan» memlekettik tarıhı-mádenı mýzeı-qoryǵynyń dırektory Máýlen Sadyqbekovke tapsyryp, ol Úlken Aqsaraı bólmesindegi arnaıy daıyndalǵan sórege ornatyldy. Eki ǵasyr boıy qoldan qolǵa ótip, endi ǵana tarıhı Otanyna jetken kıeli kitapta Kenesary hannyń móri bar.