Maqsut Narikbayev University-de MIND ǵylymı-taldaý ortalyǵy ashyldy
MIND-tyń ustanymy – Ortalyq Azııa men jalpy álemde turaqty damý maqsatyna jetýge umtylý jáne qoldanbaly zertteýler úshin sarapshylardy biriktirý. Sondaı-aq, taldaý ortalyǵynyń qundylyqtary júrgizilip jatqan zertteýlerdiń táýelsizdiginen, akademııalyq adaldyqtan, yntymaqtastyq pen seriktestikten, ashyqtyqtan, qoǵammen baılanystan jáne nátıjelerge qol jetkizýden turady. Ortalyqtyń maqsaty – Táýelsiz qoldanbaly zertteýler júrgizý, strategııalyq sheshimder qabyldaý sapasyn damytý, keńes berý, áriptestik ornatý jáne MIND ınstıtýtsıonaldyq turaqtylyǵyn qamtamasyz etý.
MIND beıtarap analıtıka shyǵaratyn táýelsiz ıdeıalar fabrıkasy ekenin jáne Maqsut Narikbayev University professorlyq-oqytýshylyq quramynyń áleýetine súıenetinin aıta ketý kerek.
Aıta ketý kerek, MIND ortalyǵy MNU men Qazaqstan Respýblıkasy Parlamenti Senatynyń birlesken jobalyq keńsesi, bul halyq pen bıznestiń keń toptarynyń bıliktiń zań shyǵarýshy tarmaǵymen baılanysyn qamtamasyz etedi jáne ózekti zańnamalyq bastamalardy ázirleýge yqpal etedi.
QR Ǵylym jáne joǵary bilim mınıstri Saıasat Nurbek óz sózinde kúrdeli geosaıası, ekonomıkalyq jáne óńirlik jaǵdaılarda analıtıka, saraptamamen jumys isteýdiń ózektiligin atap ótti. Sondaı-aq ol Ǵylym jáne joǵary bilim mınıstrligi MIND ǵylymı-taldaý ortalyǵynyń jobalary men bastamalaryn qoldaýǵa daıyn ekenin aıtty.
Іs-shara aıasynda MIND-tiń keıbir ǵylymı zertteýleriniń nátıjesi tanystyryldy jáne sońynda ǵylymı ortalyq boıynsha ekskýrsııa ótkizildi. Onyń barysynda birqatar halyqaralyq uıymdarmen, memlekettik organdarmen jáne kvazımemlekettik kompanııalarmen áriptestik kelisimder jasaldy. Maqsut Narikbayev University Basqarma tóraǵasy Talǵat Nárikbaev óz sózinde ǵylymı ortalyqtyń ashylýyna kelgen barlyq qatysýshylarǵa alǵysyn bildirdi.
«Qazirgi ýaqytta ýnıversıtet oqytýshylyq baǵyttan zertteý baǵytyna kóshýge arnalǵan jańa damý strategııasyn ázirledi. Al MIND qoldanbaly ǵylymı-zertteý ortalyǵy osy strategııanyń ajyramas bóligi»,- dedi ol.
MIND taldaý ortalyǵynyń jetekshisi Altaır Ahmetov quttyqtaý sózinde qoǵamdy, bıznesti jáne memlekettik organdardy talqylaýǵa jáne birlesken sheshimderdi ázirleýge tartý arqyly halyq únine qulaq asatyn memleket tujyrymdamasyn iske asyratynyn atap ótti.
Qoldanbaly ǵylymı-zertteý ortalyǵynyń ashylý saltanatyna Úkimet Apparatynyń, ortalyq memlekettik organdardyń, halyqaralyq uıymdar men dıplomatııalyq ókildikterdiń, jergilikti atqarýshy organdardyń, taldaý ortalyqtarynyń, joǵary oqý oryndarynyń jáne BAQ-nyń ókilderi qatysty.