Maqpalsher «Qolyńdy ber» atty jańa albomyn jaryqqa shyǵardy

NUR-SULTAN. QazAqparat - Dúnıejúzilik karantın talaptary tyń mádenı izdenisterge negiz bolyp, jańa mazmun men formadaǵy óner týyndylarynyń týýyna sebepker boldy. Aqyn, mýzykant Maqpalsher-diń (Maqpal Jumabaı) «Qolyńdy ber» albomy da - osy baǵyttaǵy eksperımenttik joba, dep habarlaıdy QazAqparat.

«Qolyńdy ber» bir mezgilde álemniń eki núktesinde – Qazaqstan men Germanııa mýzykanttarynyń qatysýymen Live rejımde jazyldy.

Albomnyń basym bóligi Berlındegi Jazzanova Recording Studio (JRS) stýdııasynda uıymdastyryldy.

Al, túsirilim jumystary Berlın jáne Almaty qalalarynda taspalanǵan.

JRS – 2013 jyly negizi qalanǵan Eýropadaǵy ozyq dybys jazý stýdııalarynyń biri. Dybys ınjeneri ári stýdııany qurýshy Axel Reinemer.

Aıta keterligi, bul stýdııada Reınemerdiń jetekshiligimen Black Eyed Peas, Rihanna, Patricia Kaas syndy álemge tanymal mýzykanttar men Universal Music, Sony Music stýdııalary dybys jazǵan.

Dál osy stýdııada jazylǵan LP5 mýzykalyq albomy 2020 jyly Grammy nomınanty atandy.

«Qolyńdy ber» atty mınıalbomnyń negizgi taqyryby – adamzat jáne onyń kókeıkesti suraqtary. Joba pandemııa kezeńindegi adamnyń kóńil-kúıi men jan bulqynysyn sıpattaıdy. Albomnyń aty aıtyp turǵandaı, bir-birimizge bir sát nazar aýdaryp, júrek kózimen qaraýǵa, qajet bolsa qol sozyp, birlesýge shaqyrady. Sonymen qatar, bul halyqaralyq joba ónerdiń álemge ortaq qundylyq ekenin dáriptep, til, dil jáne mádenı alýandylyqtyń ónerdi baıyta túsetinin dáleldeıdi. Osy oraıda jobaǵa qatysqan germanııalyq mýzykanttar: «Áý basta biz mádenı shekarany attap ótip, jobaǵa óz deńgeıinde úles qosa alamyz ba?» dep ýaıymdaǵan edik. Alaıda, ýaıymymyz is júzinde negizsiz bolyp shyqty. Kompozıtsııalardy oryndaı bastaǵanda-aq barlyq qorqynyshymyz seıildi. Bul – mýzykanyń, ónerdiń kúshi edi! «Qolyńdy ber» – biz úshin mýzykanyń múmkindigin jáne bir tanytqan ǵajap tájirıbe boldy», - dep pikir bildirdi Alex Reinemer.

Eske sala keteıik, «Qolyńdy ber» – Maqpalsher-diń ekinshi halyqaralyq mýzykalyq jobasy.

2019 jyly aqyn, kompozıtor Londondaǵy The Brunel Museum sahnasynda «AUA» kontseptýaldy kontsertin ótkizgen bolatyn.

Belgili brıtan aqyny Devıd Kýk aldyn ala aǵylshyn tiline aýdarǵan sol keshte oryndalǵan barlyq jyr kórermenge jınaq túrinde tartý etilgen.

«Qolyńdy ber» albomynyń vıdeosy YouTube platformasynda 9 qyrkúıek kúni jaryq kórdi.

Sonymen qatar jaqyn arada albomdy Itunes, Apple Music, Yandex Music, Spotify jáne basqa strımıng platformalarynda tyńdaýǵa, júkteýge bolady.