Mańyzdy 10 baǵyt: SQO-da 28 myń adam jumysqa ornalastyrylady

PETROPAVL. QazAqparat - Soltústik Qazaqstan oblysy ákimdiginiń otyrysynda óńirdiń 5 aıdaǵy áleýmettik-ekonomıkalyq damý qorytyndylary shyǵaryldy, dep habarlaıdy QazAqparat tilshisi.

Barlyq salalar boıynsha oń ósim baıqalady.

SQO ákimi baspasóz qyzmetiniń habarlaýynsha, agrarlyq sektordaǵy kórsetkish 2,4%, ónerkásipte 5,1%, ınvestıtsııa kólemi 18,6% artqan. Degenmen, óńir basshysynyń pikirinshe áli de qarqyn qosý kerek.

«Prezıdent Qasym-Jomart Toqaev halyqtyń tabysyn ulǵaıtý boıynsha tapsyrma berdi. Bizge ekonomıkany damytý úshin barlyq múmkindikterdi paıdalaný kerek. Aýyl sharýashylyǵyn odan saıyn ártaraptandyryp, bıdaı-burshaq daqyldaryn kóbeıtý kerek. Bul salaǵa memlekettiń qoldaýy kúshti», - dedi Qumar Aqsaqalov.

Turǵyndardy jumyspen qamtý - basty baǵyttardyń biri. Jyl basynan beri oblysta 6 myńǵa jýyq jumys orny paıda boldy. Jyl sońyna deıin taǵy 12 myńy ashylady, 28 myń adam eńbekpen qamtylady.

Baspana máselesi de ózekti tur. Bıyl óńirde 2245 páter salynady. 8300 adam jańa qonysqa kóshedi. 126 kóp balaly otbasy da páter kiltterine ıe bolady.

Mamandardyń aıtýynsha, qazir SQO-da 19443 adam páter kezeginde tur. Al «7-20-25» baǵdarlamasy arqyly 408 páter satylǵan.

Eske sala keteıik, 12 maýsymda ótken ulyqtaý rásimi barysynda Qasym-Jomart Toqaev on mańyzdy baǵytyn jarııalaǵan bolatyn.