Mánsııa Esekeeva: Volonterlik qyzmet –júrek qalaýymen istelinetin jumys

KÓKShETAÝ. QazAqparat - Volonter kez kelgen jastaǵy adam bolýy múmkin. Shyndyǵynda, jas aıyrmashylyǵynda eshqandaı shekteý joq. Tek, júreginde ózgege kómektesýge nıet bolsa bolǵany. Bul týraly Aqmola oblysyndaǵy «Jas Ulan» biryńǵaı balalar men jasóspirimder uıymy» qoǵamdyq birlestiginiń tóraǵasy Mánsııa Esekeeva aıtty, dep habarlaıdy QazAqparat tilshisi.

Onyń aıtýynsha, Memleket basshysynyń qatysýymen elordada ótken «Birgemiz» atty volonterler front-ofısiniń ashylýy volonterlikpen aınalysyp júrgen qazaqstandyqtar úshin aıtýly oqıǵa boldy. Volonterlerdiń ıgi isteri memleketimizge zor paıdasyn tıgizeri sózsiz. Osy oraıda, Aqmola oblysynda da volonterlerdiń qatysýymen kóptegen sharalar ótkizilýde. Bul sharalarǵa «Jas Ulan» biryńǵaı balalar men jasóspirimder uıymy» qoǵamdyq birlestigi tikeleı atsalysýda.

«Volonter degenimiz óz erkimen, ıaǵnı, sanaly túrde aınalasyndaǵylarǵa úzdiksiz kómektesip júretin jandar.​ Al volonterlik qyzmet – ol júrektiń qalaýymen istelinetin jumys. Bizdiń «Jas Ulan» biryńǵaı balalar men jasóspirimder uıymy» qoǵamdyq birlestiginiń músheleri osyndaı qaǵıdany ustanady. Ótken Jastar jylyn da qyrýar sharýa tyńdyryldy. Bulardyń arasyndaǵy mańyzdylaryna toqtala ketsem, 2019 jyldyń naýryz aıynda bilim-ınnovatsııa lıtseı-ınternatynda Aqmola oblysynyń bilim basqarmasy, ónerpaz daryndy balalarmen jumys júrgizý jónindegi oblystyq oqý-ádistemelik ortalyǵynyń qoldaýymen mektep oqýshylary arasynda «Jas Ulan» biryńǵaı balalar men jasóspirimder uıymynyń kýbogyna arnalǵan ashyq oblystyq pikir-saıys týrnırin ótkizdik. Sondaı-aq, «Bolashaqqa baǵdar: Rýhanı jańǵyrý» maqalalyq baǵdarlamasyn júzege asyrý aıasynda mektep oqýshylary arasynda «Altyn saqa» oblystyq saıysy, «Búgingi jas – erteńgi el tiregi!» atty oblystyq forýmy, QR Tuńǵysh Prezıdenti kúni aıasynda «Jas Ulan» biryńǵaı balalar men jasóspirimder uıymy kýbogyna arnalǵan oblystyq «Bala bı» sheshendik óner saıysy uıymdastyryldy», – deıdi Mánsııa Esekeeva.

Jyl saıyn elimizde, sonyń ishinde Aqmola oblysynda da volonterlerdiń sany ulǵaıýda. Qazirgi tańda qoǵamǵa paıdasyn tıgizemin deýshi jastardyń volonterler qataryna qosylýy qýantady. Jyl ótken saıyn olardyń qatary tolyǵyp keledi. Osynyń arqasynda bıylǵy Volonterler jyly da «Jas ulan» biryńǵaı balalar men jasóspirimder uıymy» qoǵamdyq birlestigi birqatar sharalardy júzege asyrýdy josparlap otyr.

«Aǵymdaǵy jyly «Jas ulan» biryńǵaı balalar men jasóspirimder uıymy» qoǵamdyq birlestiginiń kýbogyna arnalǵan oblystyq pikir-saıys týrnıri, «Qasıetti dombyra» oblystyq baıqaýy, Naýryz meıramyna oraı ınsta baıqaý, «Úzdik Ulanbasy – 2020» mektep oqýshylary arasyndaǵy oblystyq baıqaýy, «Ulanymyz uly eldiń» oblystyq forýmy, Halyqaralyq balalardy qorǵaý kúni men Memlekettik rámizder kúnine arnalǵan is-sharalar, «Qazaqshań qalaı, balaqaı?» atty balabaqsha tárbıelenýshileriniń arasyndaǵy oblystyq baıqaýy, «Jaıdarly jas ulan» mektep oqýshylary arasyndaǵy oblystyq ıntellektýaldy oıyny, «Altyn saqa» oblystyq saıysy, QR Tuńǵysh Prezıdenti kúnine arnalǵan «Bala bı» oblystyq sheshendik óner saıysy sııaqty sharalar​ kútip tur.

Sonymen qatar, jyl ishinde volonterlerge trenıng, ekologııalyq aktsııa, qaıyrymdylyq jármeńke, soǵys ardagerlerine kómek kórsetý tárizdi ózge de sharalarǵa qolǵabys etý josparymyzda bar», – dep tolyqtyrdy Mánsııa Esekeeva.

Eske salsaq, keshe Prezıdent Qasym-Jomart Toqaevtyń qatysýymen elordada volonterlerdiń «Birgemiz» respýblıkalyq front-keńsesi ashyldy.

Volonter jyly aıasynda front-keńseniń ashylýy barysynda «QQQAZVOLUNTEER.KZ onlaın platformasynyń qyzmeti jáne volonterliktiń «Bilim», «Qamqor», «Úmit», «Sabaqtastyq», «Taza Álem» jáne «Saulyq» atty 7 salalyq baǵyt boıynsha alańdary tanystyrylady.