Mánshúk pen Álııanyń erligi týraly «Taǵdyr» anımatsııalyq fılmi túsirilýde

ASTANA. QazAqparat - Mánshúk Mámetova men Álııa Moldaǵulovanyń erligi týraly «Taǵdyr» anımatsııalyq fılmi túsirilip jatyr. Bul týraly búgin Ortalyq kommýnıkatsııalar qyzmetinde ótken brıfıngte QR Mádenıet jáne sport vıtse-mınıstri Ǵalym Ahmedııarov málim etti.

«Bul anımatsııalyq fılm Mánshúk Mámetova men Álııa Moldaǵulovanyń ǵana emes, Baýyrjan Momyshulynyń da erligi týraly. Ol neshe mınýttyq bolatynyn qazir aıta almaımyn. Ol jobany Qazaqfılm aktsıonerlik qoǵamy QR Mádenıet jáne sport mınıstrliginiń memlekettik tapsyrysy boıynsha jasaýda. Bul fılmdi 9 mamyrda kóremiz degen úmit bar», - dedi ol.

Onyń aıtýynsha, mýltfılm eldegi birneshe ulttyq arnalardan kórsetiledi.

Sonymen qatar bıyl «Anaǵa aparar jol» atty fılm túsirý jumystary aıaqtalady. Sondaı-aq Uly Otan soǵysy taqyrybyna arnalǵan birqatar derekti fılmderdi túsirý jumystary júrgizilip jatyr.