Mánshúk Mámetovanyń erligine arnalǵan avtosherý Oraldan Nevelge jetpek
M.Mámetova atyndaǵy memorıaldyq mýzeıiniń dırektory, avtojoryq jetekshisi Svetlana Bektenovanyń aıtýynsha, avtojoryqqa qatysýshylar Samara, Máskeý arqyly qazaqtyń qos batyr qyzy Mánshúk pen Álııanyń, sondaı-aq Qazaqstanda qurylǵan 100-inshi jáne 101-atqyshtar brıgadalarynyń Pskov oblysyndaǵy soǵysqan jerlerimen júrip ótip, Jeńis kúnin Nevel qalasynda atap ótpek.
Batysqazaqstandyq delegatsııa quramynda mýzeı qyzmetkerleri, stýdentter men oqýshylar bar. 12 mamyrǵa deıin sozylatyn joryq barysynda Rjev, Velıkıe Lýkı, Novosokolnıkı qalalaryndaǵy baýyrlastar zıratyna gúl shoqtary qoıylady. Budan buryn ketken delegatsııanyń bes múshesi Nevel qalasynan 40 shaqyrym jerdegi Pýstoshka qalasy mańynda dalalyq lagerde izdestirý jumystaryn júrgizýde. Avtojoryqqa qatysýshylar soǵan qosylady.
«Nevel qalasynda Mánshúk Mámetovanyń jerlengeni belgili. Bıyl 15 qazanda onyń erligine 75 jyl tolmaq. Qazaqtyń batyr qyzynyń qaharmandyǵyn reseılikter de umytpaq emes. Sonymen qatar esimderi áli kúnge deıin belgisiz bolyp qalyp otyrǵan jaýyngerler az emes. Olardy anyqtaý úshin Smolensk, Habarovsk, Volgograd, Sankt-Peterbor, Kalýga, Dondaǵy Rostov qalalarynan kelgen iz kesýshilermen birge biz de jumystanamyz. Mýzeıimizge qajetti qundy jádigerler ákelý de oıymyzda», -dedi S.Bektenova.
Eske sala keteıik, Astanada bıyl Mánshúk Mámetovaǵa eskertkish ornatylatynyn budan buryn jazǵan bolatynbyz. Al qazaqtyń batyr qyzyna alǵashqy eskertkish 1979 jyly Nevel qalasynda ornatylǵan.