Manıpýlıatsııa: «SinoVac vaktsınasy omıkron nusqasynan qorǵamaıdy»

NUR-SULTAN. QazAqparat – Qaznette SinoVac shyǵarǵan CoronaVac vaktsınasy SARS-CoV-2 koronavırýsynyń omıkron nusqasyna qarsy qorǵanysty qamtamasyz etpeıdi degen qorytyndy shyǵarylǵan jaqynda júrgizilgen zertteý týraly aqparat taralýda. Bul aqparatta manıpýlıatsııa belgileri bar. Nege ekenin túsindirip óteıik, dep jazady stopfake.kz.

Aldymen SinoVac óndirgen CoronaVac vaktsınasy DDSU-men maquldaǵanyn jáne álemniń 52 elinde, sonyń ishinde Qazaqstanda da paıdalanylatynyn atap ótkenimiz jón. Ekpe Qytaı, Chılı, Fılıppın, Túrkııa jáne Taılandta 29 klınıkalyq synaqtan ótti. Onyń beseýi birinshi kezeń, 12 – ekinshi, 12 – úshinshi kezeń aıasynda ótkizildi.

CoronaVac – tıimdiligi men qaýipsizdigi ǵylymı dáleldengen ınaktıvtendirilgen vaktsına. Preparattyń quramy, onyń tolyq sıpattamasy jáne janama áserleri týraly aqparatty QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń resmı portalynan tabýǵa bolady.

Qaznet paıdalanýshylary jazyp otyrǵan zertteý bul preparattyń paıdasyz ekendiginiń belgisi emes. Birinshiden, búgingi kúni ol retsenzııadan ótpegenin atap ótkenimiz jón, bul týraly eńbek mátini jarııalanǵan Nature Medicine saıty habarlady.

Ekinshiden, zertteýdiń ózi CoronaVac preparatynyń eki dozasymen egilgen adamdar saldyrǵan Pfizer/BioNTech vaktsınasynyń býsterlik dozasynyń tıimdiligin anyqtaýǵa arnalǵan.

Onda býsterlik doza omıkron nusqasynan qorǵanys deńgeıin edáýir arttyratyny, sondaı-aq «CoronaVac vaktsınasynyń eki dozasyn alǵan qatysýshylarda Omıkrondy beıtaraptandyrý anyqtalmaǵany» aıtylǵan.

Alaıda, bul CoronaVac patogenniń osy nusqasyna qarsy múldem paıdasyz degenniń belgisi emes. XinhuaNet qytaı basylymynyń habarlaýynsha, DDSU sarapshylary bul preparat aýrýdyń aýyr aǵymyn jáne omıkron nusqasyn juqtyrǵan kezde aýrýhanaǵa jatqyzýdy boldyrmaýǵa qabiletti dep málimdedi.

Dúnıejúzilik densaýlyq saqtaý uıymynyń tótenshe jaǵdaılar jónindegi menedjeri Abdı Mahamýdtyń CoronaVac vaktsınasy omıkron nusqasyn juqtyrǵan jaǵdaıda aýrýdyń aýyr aǵymynyń aldyn alady degen sózderin South China Morning Post basylymy da keltirdi.

Qoryta aıtqanda, CoronaVac vaktsınasynyń omıkron nusqasynan qorǵaý deńgeıi tómen bolǵanymen, indetke shaldyqqan adamdardy aýrýhanaǵa jatqyzýdan jáne ólimnen saqtaı alady. Sonymen qatar, bul vaktsınanyń SARS-CoV-2 koronavırýsynyń barlyq basqa mýtatsııalarynan qorǵaýda tıimdiligin joǵary, bul klınıkalyq zertteýlerdiń nátıjelerimen rastalady.