Mańǵystaýlyqtardy gazben tolyq qamtamasyz etý úshin 266 mlrd teńge jumsalady

NUR-SULTAN. QazAqparat – 2025 jylǵa deıin Mańǵystaý oblysynda gaz qubyrlaryn jóndeý men salýdy kózdeıtin 7 joba iske asady, dep habarlaıdy QazAqparat tilshisi.

Bul týraly Energetıka mınıstri Maǵzum Myrzaǵalıev Úkimet otyrysynda málim etti.

«Óńirdi gazdandyrý máselesine keletin bolsaq, oblysta jalpy quny 266,6 mlrd teńge bolatyn 7 gaz ınfraqurylymy jobasyn iske asyrý josparlanyp otyr», - degen mınıstr solardyń eń negizgilerine qysqasha toqtaldy.

Olar:

- jalpy somasy 207,4 mlrd teńgege «Beıneý-Jańaózen» ýchaskesiniń 1-shi jelisin kúrdeli jóndeý jáne 2-shi jelisin salý jobasy;

- 16,5 mlrd teńge qajet etip otyrǵan «Jańaózen-Aqtaý» magıstraldyq gaz qubyryn kúrdeli jóndeý jobasy;

- 25,7 mlrd teńge salý josparlanǵan Quryq aýylyna «Jańaózen-Aqtaý» magıstraldyq gaz qubyrynan gaz burý jáne gaz taratý qubyrlaryn salý jobasy.

«Osy jobalardy iske asyrýdyń arqasynda Mańǵystaý oblysyn gazben jabdyqtaý máselesi tolyq sheshiledi. Jumys istep turǵan «Qazaq gaz óńdeý zaýytynyń» tozý deńgeıi óte joǵary. Memleket basshysynyń tapsyrmasy boıynsha Jańaózen qalasynda zamanaýı gaz óńdeý zaýytyn salý josparlanǵan.

Bul zaýyt álemdik standarttarǵa sáıkes jylyna 900 mln tekshe kóleminde shıki gazdy qaıta óńdeıtin bolady.

Osyǵan baılanysty, «QazMunaıGazǵa» bul jobany iske asyrý jumysyn jedeldetý qajettigin atap ótemin», - dedi Maǵzum Myrzaǵalıev.