Mańǵystaýlyqtar Ulystyń uly kúnin qalaı atap ótedi

AQTAÝ. QazAqparat - Mańǵystaýda Ulystyń uly kúni toılana ma? Bul suraqqa búgin oblystyń bas sanıtar dárigeri Ǵazız Nadýev jaýap berdi.

Óńirdiń bas sanıtarııalyq-epıdemıologııalyq departament basshysynyń aıtýynsha, 17 naýryz kúni óńirdegi koronavırýs ınfektsııasy boıynsha reprodýktıvti kórsetkish 1,05 qurady. Osyǵan baılanysty, barlyq merekelik sharaǵa tyıym salynǵan.

«Nur-Sultan, Almaty qalalarynda aldaǵy meıramǵa qarsy qatań lokdaýn jarııalandy. Biz de saqtyq sharalaryn esimizden shyǵarmaıyq. Ulystyń Uly kúnin úıde otyryp, óz otbasymen toılaǵan durys. Óıtkeni, adamdardyń syrtta jıi júrýi, bir-birimen tyǵyz qarym-qatynasy koronavırýs indetiniń órshýine ákeledi», - dedi Ǵazız Nadýev.

Aıta keteıik, buǵan deıin bas sanıtar dáriger Mańǵystaýda sońǵy táýlikte koronavırýs ınfektsııasyn juqtyrǵandardyń sany kóbeıgenin aıtqan bolatyn.

Ǵazız Nadýevtiń málimetinshe, 17 naýryz kúni óńirdegi koronavırýs ınfektsııasy boıynsha reprodýktıvti kórsetkish 1,05 qurady. Osyǵan deıin bul kórsetkish 0.6, 0.7 bolǵan.