Mańǵystaýlyqtar mal tapsyryp, sýbsıdııa ala alady

AQTAÝ. QazAqparat – Mańǵystaý oblysynda sharýa qojalyqtary et kombınatyna iri qara jáne usaq maldardy tapsyryp, mal basyna, salmaǵyna qaraı memleketten sýbsıdııa alý múmkindigine ıe, dep habarlaıdy QazAqparat tilshisi.

Mańǵystaýlyqtar maldy Jańaózen qalasynda ornalasqan «Korkem Alem» et kombınatyna tapsyra alady.

«Sýbsıdııa iri qara jáne usaq maldyń erkek daraqtarynyń qunyn arzandatý baǵyty boıynsha beriledi. Ony alý úshin birneshe talap qoıylǵan. ıAǵnı, tapsyrylatyn mal aýyl sharýashylyǵy janýarlaryn birdeılendirýdiń derekter bazasynda tirkeýde turýy tıis. Et kombınatyna tapsyrar kezde iri qaranyń jalpy salmaǵy 400-450 kg arasynda, jasy 7 aıdan 18 aıǵa deıin bolý shart. Іri qaranyń analyǵy, ıaǵnı sıyrlar sharýa qojalyqtyń menshiginde bolýy qajet. Usaq maldyń jasy 4-12 aıǵa deıin, jalpy salmaǵy 30 kg-dan tómen bolmaýy tıis. Іri qara jáne usaq maldy da ótkizý kezinde qabyldaýshy taraptyń (et kombınatynyń) zerthanasynan berilgen anyqtama usynylýy kerek» - delingen «Korkem Alem» JShS baspasóz qyzmetiniń málimetinde.