Mańǵystaýlyq jas kásipker tabıǵı tyńaıtqysh óndire bastady

AQTAÝ. QazAqparat – Mańǵystaý oblysynyń Munaıly aýdanynda jeke kásipker Gúlmıra Qurmanııazova ártúrli ádisterdi qoldanyp, organıkalyq tyńaıtqysh túri – kompost óndirip jatyr. Bul týraly Munaıly aýdany ákimdiginiń baspasóz qyzmetinen málim etti, dep habarlaıdy QazAqparat tilshisi.

Kompost – qazirgi kezde qoljetimdi eń jaqsy organıkalyq tyńaıtqyshtardyń biri. Onyń quramynda ósimdiktiń damýy men ósýine qajetti barlyq mıneraldar bar. Sondaı-aq topyraqtaǵy ylǵaldy saqtap, ósimdikterdi sýarýǵa jumsalatyn sýdy 40 paıyzǵa deıin azaıtady. Ósimdikterdiń ımmýndyq júıesin nyǵaıtyp, ártúrli vırýstyq aýrýlar men aǵash zııankesterinen qorǵaıdy.

«Jeke kásipkerdiń negizgi maqsaty – óńirdi jasyl aımaqqa aınaldyryp, odan shyqqan tabıǵı ónimderdi paıdalaný. Kásipker aldaǵy ýaqytta tabıǵı tyńaıtqysh kompost ónimin kóbeıtip, Basqudyq aýyldyq okrýginde ornalasqan egistik bazaryndaǵy kásipkerlermen kelisimshartqa otyryp, naryqqa shyǵarýdy josparlap otyr», - delingen baspasóz málimetinde.

Kásipkerge Munaıly aýdanynyń ákimdigi aldaǵy ýaqytta memleket grantyn utyp alyp, kásibin qarjylandyrýǵa keńes berdi.

Aıta keteıik, buǵan deıin Qaraqııa turǵyny jer tyńaıtýǵa arnalǵan kalıfornııalyq shylaýshyn ósirýmen aınalysatynyn jazǵan edik.

Foto: Mańǵystaý oblysy óńirlik kommýnıkatsııa ortalyǵy