Mańǵystaýlyq zergerdiń buıymdary Reseı men Ýkraınada suranysqa ıe

AQTAÝ. QazAqparat - Jastaıynan qolóner buıymdaryna qyzyǵyp ósken mańǵystaýlyq zerger Nurseıit Órken búginde túrli buıymdar jasaýmen aınalysady.

Ol ótken jyly «Bıznestiń jol kartasy-2020» memlekettik baǵdarlamasy aıasynda 2,5 mln teńge kóleminde grant utyp alǵan.

Qarajatqa qural-jabdyq satyp alyp, zergerlik buıymdar jasaıdy.

«Mektepte oqyp júrgen kezden bastap aǵash pen ermeksazdan músin jasaýdy unattym. Oral Tańsyqbaev atyndaǵy Almaty sándi-qoldanbaly óner kolledjine túsip, kórkemdep metall óńdeýshi mamandyǵyn jáne Abaı atyndaǵy ınstıtýtta beıneleý óneri jáne sýret salý fakýltetinde oqyp bitirdim. Oqýymdy aıaqtaǵan soń Almaty qalasynda kishigirim tsehta zergerdiń kómekshisi bolyp jumys jasadym. 2018 jyly Aqtaý qalasynda zerger-jóndeýshi, sánger-dızaıner bolyp qyzmet atqardym»,- deıdi jas kásipker.

Nurseıit Órken ártúrli metalldan syrǵa, saqına, alqa, monetalar jasaıdy.

Jas kásipkerdiń aıtýynsha, Reseı, Ýkraına elindegi zergerlerdiń tapsyrysy boıynsha 3D modelde jasaǵan jumystary da bar.