Mańǵystaýlyq turǵyn úı aýlasyna esirtki ósirgen
9 qazan kúni saǵat 15:30 shamasynda jedel-izdestirý sharalary barysynda Munaıly aýdanynda ornalasqan ýchaskelerdiń birinde 36 jastaǵy er adam quryqtaldy. Esirtkige qarsy is-qımyl basqarmasynyń qyzmetkerleri júrgizgen tintý jumystary kezinde azamattan ótkir ıisti marıhýanaǵa uqsas esirtki zat jáne qaǵazǵa oralǵan úsh dana ósimdik dánderi tárkilendi.
Sonymen qatar, turǵylyqty meken jaıdyń aýlasyn tekserý barysynda 10 túp marıhýana tárizdes esirtki zattary men 30 dana dán, odan bólek, polıetılendi paketke saqtalǵan jasyl tústi esirtkige uqsas zattar tabylyp, tárkilenip alyndy. Esirtki zattaryn ósiretin arnaıy jaryqtyń 15 danasy anyqtaldy. Tárkilenip alynǵan on túp marıhýana zatynyń salmaǵy 8 keli 360 grammdy qurady.
Atalǵan derek QR QK-niń 300-baby (Quramynda esirtki zattar bar, ósirýge tyıym salynǵan ósimdikterdi zańsyz egip-ósirý) boıynsha tirkeldi. Ózge málimetter tergeý múddesine saı jarııa etilmeıdi.
Foto: polisia.kz