Mańǵystaýlyq túlekter kesh ótkizýdiń ornyna muqtaj jandarǵa kómektesti

AQTAÝ. QazAqparat - Mańǵystaýlyq 3 mekteptiń túlekteri bitirý keshinen bas tartyp, qarajatty qaıyrymdylyqqa jumsady, dep xabarlaıdy QazAqparat tilshisi.

Munaıly aýdany, Qyzyltóbe aýyly №6 mekteptiń oqýshylary jınalǵan qarajatty saýapty iske jumsap, Ramazan aıynda ıgi bastama bastady. Aýyldaǵy jalǵyzbasty kópbalaly ananyń jaǵdaıymen tanysyp, oǵan úıine qajetti tósek jabdyqtary, úlken kilem, as ishetin stol, ydys-aıaq, azyq-túlik alyp berdi.

«Túlekter keshin toılamaımyz dep biraýyzdan sheshtik. ıAǵnı, jınalǵan qarajatty muqtaj otbasylardyń qajetine jumsaıyq dedik. Ata-analarymyz da qoldady», - deıdi 11-synyp oqýshysy Dınara Qydyrbaeva.

Kózine jas alǵan ana qýanyshyn jasyra almady.

«Aınalaıyndar, kóp raxmet. Jaqsylyqtaryń Alladan qaıtsyn», - dep rızashylyǵyn bildirdi Aıman Otarbaeva.

Túlekter ári qaraı mektebinde jınalyp, az qamtylǵan taǵy 3 otbasyny qýantty. Bireýiniń balasyna sport kıimderin, birine saýyqtyrý shıpajaıyna joldama, taǵy bir otbasynyń balasyna lagerge joldama alyp berdi.

Al, qaladaǵy №11 mamandandyrylǵan fızıka-matematıka mektebiniń túlekteri jınalǵan qarajatty balalar úıine aýdarmaq. Osylaısha, qamkóńil búldirshinderdi qýantyp, Ramazan aıynda ıgi bastamany jalǵastyrmaq.