Mańǵystaýlyq sýyqta qalǵan qoqıqazdy qutqardy

AQTAÝ. QazAqparat - Áleýmettik jelide qoqıqazdy sýyqtan qutqarǵan mańǵystaýlyq turǵynnyń vıdeosy jarııalandy, dep habarlaıdy QazAqparat tilshisi.

Vıdeo avtory sýyq kúnde muzdap ushyp kete almaǵan qoqıqazdy qutqarǵanyn aıtady. Turǵyn qusty ǵımaratqa kirgizip, qalaı jylytyp jatqanyn taspaǵa túsirgen.

Taspaǵa qarap tońyp qalǵan qusty Mańǵystaý turǵyny ken oryndarynyń birinen tapqanǵa uqsaıdy. Er adam álsirep qalǵan qusty jyly jerge ornalastyrǵan. Qus jylynyp kúsh jınaǵan soń, vıdeo avtory ony bosatyp jibergen.

Eske salsaq, buǵan deıin Aqtaýǵa qoqıqazdyń alǵashqy toby ushyp kelgenin habarlaǵan bolatynbyz.

Qazir qustar shahar mańyndaǵy Qarakól aýmaǵyna aıaldaǵan. Mamandardyń aıtýynsha, Aqtaýǵa qoqıqazdar Aqmola oblysyndaǵy Qorǵaljyn memlekettik tabıǵı qoryǵynyń aýmaǵyndaǵy Teńiz jáne Qorǵaljyn kólderinen ushyp kelgen.